Spila, syngja og leika

Hjördís Anna, Hálfdán Helgi og Matthías Davíð Matthíasbörn hafa áhuga á mörgu, til dæmis tónlist. Hjördís Anna spilar á básúnu, Hálfdán Helgi æfir á trommur/slagverk og Matthías Davíð á trompet.

Eruð þið í hljómsveit?

HA: Já, við erum öll í hljómsveit sem heitir Skýjaglópar, ásamt tveimur öðrum krökkum sem heita Brynjar og Elín. Ég er líka í Skólahljómsveit Kópavogs og spila á básúnu. Svo er ég líka í hljómsveit sem heitir Svarta Sól, í henni er ég með Elínu vinkonu minni og bróður mínum Hálfdáni.

HH: Ég er í Skólahljómsveit Kópavogs og Skýjaglópum og einnig í sveitinni með Hjördísi og Elínu vinkonu minni.

MD: Ég er í Skýjaglópum og Skólahljómsveit Kópavogs.

Hvar spilið þið helst?

Öll: Skýjaglópar spila mest í kirkjum og Skólahljómsveit Kópavogs spilar úti um allt.

HH: Já, Skýjaglópar sungu til dæmis sunnudagaskólalag ársins sem er eftir Gumma Kalla, prest í Lindakirkju.

Hvað fleira eruð þið helst að bralla?

HA: Ég er í Barnakór Ástjarnarkirkju og Unglingagospelkór Lindakirkju.

HH: Við Matthías erum með kvikmyndafélag sem heitir MH kvikmyndir og gerum alls konar myndir og setjum á Facebook-síðu MH kvikmynda.

MD: Ég hef mikinn áhuga á töfrabrögðum og kallast Matti Magic þegar ég er að sýna. Leiklist finnst mér mjög skemmtileg og ég lék langafann í Óvitum og fleira, en ég er núna að æfa fyrir Útvarpsleikhúsið í Elsku Míó minn og að leika í Línu Langsokk. Svo er líka gaman að búa til stuttmyndir með Hálfdáni.

Hafið þið einhvern tíma til að leika ykkur?

HA: Já, oftast á fimmtudögum og um helgar þegar ég er ekki að syngja einhvers staðar eða spila, annars er ég alltaf á fullu alla daga.

HH: Ég hef nægan tíma til að leika mér þrátt fyrir allt það sem ég er að gera.“

MD: Nei! … jú, kannski stundum.

Hvernig finnst ykkur skemmtilegast að leika ykkur?

HA: Mér finnst mjög skemmtilegt í íþróttum, til dæmis í fótbolta og á skíðum. Eitt sinn þegar ég var að prufa snjóbretti með frænku minni í fyrsta skipti þá datt ég á höndina og handleggsbrotnaði en fyrir utan það þá finnst mér snjóbretti mjög skemmtilegt.

HH: Mér finnst skemmtilegast að leika mér bara við að búa til kvikmyndir.

MD: Að æfa mig í töfrabrögðum og búa til leiksýningar.

Eruð þið farin að velta fyrir ykkur hvað ykkur langar að verða þegar þið verðið stór?

HA: Ég ætla að verða tannlæknir, tónlistarkona og söngkona.

HH: Já, mig langar rosalega að verða kvikmyndagerðarmaður, söngvari og líka trommari.

MD: Ég mundi vilja verða leikari!