Sigmundur Davíð segir vogunarsjóðina ekki kaupa Arion til að innleiða ný vinnubrögð í bankastarfsemi

Sigmundur Davíð Gunnlaugsson, þingmaður Framsóknarflokksins, er gagnrýninn á kaup Goldman Sachs og þriggja vogunarsjóða á stórum hlut í Arion banka. Hann spyr hver sé raunverulegur tilgangur kaupanna og efast um að þau sé gerð með hagsmuni íslensks samfélags að sjónarmiði.

„Þessir aðilar eru ekki að koma hingað vegna þess að þeir sjá tækifæri í að innleiða ný vinnubrögð í bankastarfsemi, sækja sér nýja kúnna, lækka vexti eða eitthvað slíkt. Þvert á móti held ég að þeir sjái sér hag í því að halda vöxtum háum og reyna með þessu móti að hámarka endurheimtur sínar úr íslensku samfélagi,“ sagði Sigmundur Davíð í kvöldfréttum Stöðvar 2 þar sem hann ræddi kaupin á Arion banka ásamt Óla Birni Kárasyni, formanni viðskipta- og efnahagsnefndar Alþingis en innslagið í heild sinni má sjá hér að ofan.

Sagði Óli Björn að miklu skipti að með kaupunum væri verið að tryggja beint eignarhald á Arion banka þó vissulega mætti setja spurningarmerki við að vogunarsjóðir ættu svo stóran hlut í bankanum.

„Ég tek undir með forsætisráðherra að þetta séu fremur jákvæð tíðindi en hitt. Auðvitað geta menn velt því fyrir sér hvort að þessir aðilar séu heppilegustu eigendur til framtíðar að banka. Ég held að það sem skiptir máli er að við erum að minnsta kosti að fá beint eignarhald að hluta til í Arion banka og það er verið að undirbúa jarðveginn að skráningu bankans á almennum hlutabréfamarkaði og það held ég sé gríðarlega mikilvægt,“ sagði Óli Björn.

Líklega ekki haft tíma til þess að fara í gegnum nálarauga Fjármálaeftirlitsins

Óli Björn var einnig spurður að því hverja hann teldi vera ástæður þess að tveir af vogunarsjóðunum, Taconic Capital og Attestor Capital, hafi keypt hvor um sig 9,99 prósent hluta í Arion banka, eru þeir því aðeins 0,01 einu prósenti frá því að fara með virkan eignarhlut. Við það þarf Fjármáleftirlitið að kanna hæfi aðilanna til þess að fara með slíkan eignarhlut.

„Ég held að svarið sé augljóst. Það er auðvitað vegna þess að það hefur ekki unnist tími hjá þeim til þess að fara í gegnum þetta nálarauga Fjármálaeftirlitsins,“ sagði Óli Björn og tók undir með Benedikti Jóhannessyni, fjármálaráðherra, að mikilvægt væri að upplýst væri um endanlega eigendur þeirra sem fara með eignarhlutinn í Arion banka sem um ræðir.

Sigmundur Davíð sagði að mikilvægt væri að að kanna tenginguna á milli þessara aðila til þess að hægt væri að átta sig á því hvort að líta ætti á eign þeirra aðila sem nú keyptu í Arion banka sem eina heild.

„Við þurfum að vita hvort þessir aðilar séu tengdir og þá hvernig. Það er augljóst að þeir eru tengdir því að þeir eru að vinna að þessu saman. Þeir eru í sameiningu búnir að tryggja sér kauprétt á meirihluta í þessum banka. Er eignarhaldið á bak við tengt líka? Ef svo er þá á að líta á þá sem eina heild og þá þurfa þeir að fara í gegnum þetta ferli.“

Innslagið í heild sinni má sjá í spilaranum hér að ofan.