Fagnaðarlæti þegar manninum var bjargað af þaki bílsins - Myndband

Maðurinn sem ók bíl út í Ölfusá á ellefta tímanum í morgun eftir eftirför lögreglu er nú á leið á sjúkrahús í Reykjavík. Líðan hans er eftir atvikum góð; hann var kaldur, með skrámur og einhver eymsli en komst til að mynda að sjálfsdáðum út úr bílnum og upp á þak hans þegar bíllinn var kominn út í ána.

Samkvæmt upplýsingum frá lögreglunni á höfuðborgarsvæðinu hófst eftirförin í Vogahverfi í Reykjavík rétt fyrir klukkan 10 í morgun þar sem maðurinn sinnti ekki stöðvunarmerkjum lögreglu. Hún barst síðan upp Ártúnsbrekkuna, inn á Hellisheiði, niður Kambana til Hveragerðis og þaðan til Selfoss þar sem hún endaði.

Björgunarsveitarmenn komu línu til mannsins þar sem hann var á þaki bílsins og fóru síðan á bát til að bjarga honum. Á myndbandinu hér fyrir neðan má sjá þar sem manninum er bjargað en fjöldi fólks fylgdist með aðgerðum viðbragðsaðila og brutust út fagnaðarlæti þegar manninum var náð af þaki bílsins.