Costco-bensínið er lyfleysa

Hinn meinti eldsneytissparnaður sem kaupendur Costco-bensíns greina frá á samfélagsmiðlum er tilkominn vegna annarra þátta en eldsneytisins sjálfs. Líklegast verður að telja að ökumenn vandi sig meira við aksturinn eftir umræðuna um yfirburði eldsneytisins. Það leiði til ómeðvitaðs sparaksturs.

Þetta er mat Runólfs Ólafssonar, framkvæmdastjóra FÍB, sem hefur ekki farið varhluta af þeirri umræðu sem myndast hefur á samfélagsmiðlum eftir opnun bensínstöðvar Costco í Kauptúni. Fjölmargir hafa fullyrt að eldsneytið sem verslunin selur, hið svokallað Kirkland-bensín, sé þeim eiginleikum gætt að draga úr eyðslu bílsins, jafnvel um 10 til 15 prósent. Það megi rekja til íblöndunarefni sem Costco setur í eldsneyti sitt.

Runólfur minnti á í Bítinu í morgun að eldsneyti sé uppfullt af alls konar efnum og neitar hann því ekki að sum þeirra, í ákveðnum tilfellum, geta haft jákvæð áhrif á eyðslu bílsins.

Sjá einnig: Garðabær veitir Costco leyfi til að stækka bensínstöðina

„En við erum ekki að sjá einhverja svona eyðsluminnkun eins og talað er um á samfélagsmiðlum. Það er meira einhver sparakstur sem fólk hefur farið að iðka prívat og það er bara jákvætt,“ segir Runólfur og vísar í ítarlega rannsókn sem framkvæmd var á V-Power eldsneytinu sem selt hefur verið hjá Skeljungi.

Niðurstaðan hafi verið sú að hið sérþróaða V-Power gat haft einhver áhrif á öflugar vélar en gerði lítið fyrir hefðbundnari vélar, t.a.m. í fólksbílnum. Áhrifin fólust helst í snerpu og getu bílvélanna, sem og hreinsun þeirra.

„En ef fólk er að keyra með eðlilegum hætti þá er það ekki eitthvað sem maður ætti að hafa áhyggjur af,“ segir Runólfur og brýnir fyrir fólki að fylgja leiðbeiningum framleiðenda í þessum efnum.

Hugarfarið svarið

Líklegast þykir honum að fólk sem kaupir Costco-bensínið sé ómeðvitað farið að stunda meira sparakstur. Aftur vísar hann til umfangsmikillar rannsóknar sem framkvæmd var af systursamtökum FÍB í Þýskalandi. Þar hafi verið látið reyna á margvísleg tól og tæki sem fullyrt var að hefðu jákvæð áhrif á eldsneytisnotkun bíla, s.s. hólka sem setja átti við eldsneytistankinn.

Sjá einnig: Bensínið í Costco blandað bætiefnum

Fljótlega hafi komið í ljós að tækin sjálf hefðu engin áhrif eldsneytiseyðsluna - en þrátt fyrir það var fólk fullvisst um að dregið hafi úr henni.

„Græjunar sem slíkar voru „hókus pókus“-lausnir en svo kom sá þáttur að fólk taldi sig vera að ná sparnaði. Þá voru fengnir félagsfræðingar og sálfræðingar sem sögðu „Við erum að kaupa eitthvað sem við teljum að eigi að gera gagn og ósjálfrátt förum við að hafa hugann við það sem við erum að gera,“ segir Runólfur.

Bara við það að hafa hugann við að fara í takti við umferðina, að ökumenn séu ekki alltaf að ýta á bensíngjöfina eða hemla harkalega, geti leitt til verulegs eldsneytissparnaðar útskýrir Runólfur.

Etanólið útskýrir ekki muninn

Þá barst talið að etanóli sem ríkið krefst að blandað sé í eldsneyti til að það sé umhverfisvænna.

Etanól hefur minna orkugildi og heimilt er að blanda því 10% á móti eldsneytinu. Runólfur segir þó að þrátt fyrir að etanólið væri ekki í myndinni ætti það ekki að leiða til þeirra 10 til 15% eldsneytissparnaðar sem rætt er um á samfélagsmiðlum.

Skýringuna megi finna annars staðar - líklega í meðvitaðri akstri eins og áður hefur verið rakið.

Costco með 10 prósent?

Runólfur segir augljóst að koma Costo hafi hrist upp í markaðnum. Ekki einungis séu olíufélög farin að færa sig inn á smávörumarkaðinn, eins og með kaupum Haga á Olís og N1 á Festi, heldur sé fólk farið að fá hærri afslætti hjá gömlu olíufélögunum. Verðmyndunin sé að breytast.

Þá virðist Costco vera að taka ansi stóran hluta af markaðanum að mati Runólfs, þrátt fyrir að vera bara með eina stöð. Hann áætlar að stöðin selji um 100 þúsund lítra á dag - „og ef við uppreiknum það yfir árið þá er Costco með um 10% af markaðnum,“ áætlar Runólfur og bætir við að standist þeir útreikningar væri það „verulegt áfall“ fyrir hinar stöðvarnar.

Viðtalið við Runólf má heyra hér að neðan.