Þrettán kynlífsþrælar leystir úr prísund á Spáni

Lögreglan á Spáni hefur bjargað þrettán konum sem voru neyddar til vændis nærri strandbænum Marbella. Talið er að konurnar séu búlgarskar en 34 grunaðir meðlimir glæpagengis voru handteknir í aðgerðum lögreglu.

Í yfirlýsingu frá lögreglunni kemur fram að gengið hafi flutt inn konurnar frá fátækum svæðum Búlgaríu og hótað þeim og fjölskyldum þeirra ofbeldi ef þær óhlýðnuðust. Þær voru látnar selja sig á götum strandbæjarins Puerto Banús.

Konurnar eru einnig sagðar hafa verið látnar stela frá „viðskiptavinum“ sínum og grunur leikur á að einhverjum þeirra hafi verið gefin lyf.

Rannsókn á mansalshringnum hófst eftir ábendingu frá konu sem slapp úr greipum hans fyrir þremur árum. Afhjúpaði lögreglan á endanum alþjóðlegt net glæpamanna sem starfaði aðallega á Spáni og í Búlgaríu, að því er kemur fram í frétt breska ríkisútvarpsins BBC.

Flestar handtökurnar voru gerðar á Spáni en átta manns voru handteknir í Búlgaríu.