Gaf bílstjóranum sínum Mercedes Benz

Brasilíski miðjumaðurinn Paulinho verður kynntur til leiks hjá Barcelona í dag.

Spænsku bikarmeistararnir keyptu hinn 29 ára gamla Paulinho á 36,4 milljónir punda frá Guangzhou Evergrande á mánudaginn.

Paulinho lék í tvö ár með Guangzhou og forráðamenn kínverska félagsins bera honum vel söguna og segja Brassann mjög örlátan.

Paulinho gaf t.a.m. bílstjóranum sínum Mercedes Benz bíl og Beats heyrnatól að sögn Liangs Ke, eins af forráðamönnum Guangzhou.

Paulinho skrifaði undir fjögurra ára samning við Barcelona. Hann er fjórði leikmaðurinn sem Börsungar kaupa í sumar. Áður voru Gerard Deulofeu, Nélson Semedo og Marlon Santos komnir til Katalóníufélagsins.