Óþvegna salatið innflutt frá Ítalíu

Hið óþvegna salat sem olli því að meirihluti starfsliðs Hvassaleitishluta Háaleitisskóla fékk magapest var innflutt blaðsalat frá Ítalíu. Salatið fór eingöngu í stór eldhús en ekki í smásölu á almennan markað.

Þetta kemur fram í tilkynningu frá Heilbrigðiseftirliti Reykjavíkur. Þar segir að á umbúðum salatsins komi fram að salatið sé óþvegið. Heimilt er að dreifa slíku salati en nauðsynlegt er að það sé þvegið og skolað vel áður en það er notað.

Rannsóknir á salatinu hafa leitt í ljós hugsanlegan sýkingarvald, bakteríuna Aeromonas hydrophila, sem þekkt er að getur valdið veikindum eins og hér um ræðir. Bakterían finnst víða í umhverfinu, sérstaklega í menguðu vatni og því mikilvægt eins og áður segir mikilvægt að skola grænmeti vel.

Samkvæmt upplýsingum Heilbrigðiseftirlits Reykjavíkur hafa ekki komið upp veikindi á öðrum stöðum en í ofangreindum skólum. Líklegar skýringar á því geta verið að smit sé misdreift í salatinu sem og mismunandi meðferð salatsins hvað varðar skolun.