Stöðva dreifingu mjólkur frá Viðvík

Dreifing mjólkur hefur verið stöðvuð til bráðabirgða frá bænum Viðvík í Skagafirði. Ástæða dreifingarbanns er að eftirlitsmanni Matvælastofnunar var meinaður aðgangur að eftirlitsstað.

Í tilkynningu frá Matvælastofnun segir að ef ekki sé unnt að að framkvæma eftirlit geti stofnunin ekki sannreynt að framleiðslan uppfylli ákvæði laga um hollustuhætti í matvælaframleiðslu.

Samkvæmt matvælalögum er matvælafyrirtækjum skylt að veita óhindraðan aðgang til eftirlits á þeim stöðum þar sem framleiðsla eða dreifing matvæla á sér stað.

Dreifing mjólkur frá bænum verður stöðvuð þar til eftirlit getur farið fram.