Svar Línu Birgittu við þrálátum orðrómi vekur athygli á Snapchat

Lína Birgitta Camilla Sigurðardóttir er ein vinsælasta Snapchat-stjarna landsins. Hún heldur úti reikninginum Linethefine og fylgjast mörg þúsund Íslendingar með henni á hverjum einasta degi.

Nýjasta innlegg hennar hefur vakið mikla athygli en í gær birti Lína langa og ítarlega sögu á Snapchat þar sem hún svarar orðrómi sem hún hefur verið að heyra úti í samfélaginu.

„Það slúður sem er búið að vera í gangi er að ég á að hafa sofið hjá vinkonu minni og að Sverrir Bergmann, sem ég hef verið með í þrjú ár, hafi séð það, orðið brjálaður og hætt með mér.“

Lína segir að þessi orðrómur hafi gengið um landið undanfarið.

„Mér finnst ógeðslega leiðinlegt að heyra þetta. Að Sverri hafi orðið vitni af þessu, orðið brjálaður og hent mér út. Núna ætla ég að segja ykkur það að ég og Sverrir Bergmann Magnússon erum hætt saman. Það hvarflaði ekki að mér að það væri hægt að eiga gott og fallegt breakup með manneskju. Ég hef aldrei orðið vitni af eins góðu sambandssliti og við áttum og erum að ganga í gegnum núna.“

Lína segir að gríðarleg virðing og kærleikur sé enn á milli hennar og Sverris.

„Við erum svo ótrúlega góð við hvort annað. Mig langar ótrúlega mikið að koma inn á það að þetta breakup var algjörlega sameiginlegt. Eins og ég hef sagt svona milljón sinnum á Snapchat, þá erum við eins og svart og hvítt. Maður hefur oft heyrt að það sé gott að vera svolítið ólíkar manneskjur í sambandi, en við vorum of ólík.“

Lína segir að þau hafi ekki viljað breyta hvort öðru.

„Þetta er drullu fokking erfitt. Þótt að ég tók þá ákvörðun að flytja út, þá er þetta alltaf sárt af því að hann er besti vinur minn,“ sagði Birgitta en á þessum tímapunkti í innlegginu brotnaði hún niður.