Minnst fjórir látnir í úrhelli

Minnst fjórir eru látnir og þúsundir hafa yfirgefið heimili sín í austurhluta Rúmeníu vegna úrhellis síðustu daga. Flóðaviðvörun gefin út í stærstum hluta landsins.

Hermenn hafa verið kallaðir út til að aðstoða íbúa en rafmagnslaust er víða og vegir ónýtir vegna vatnavaxtanna. Þá hefur vatnsflaumur eyðilagt brýr og mannvirki.

Júnímánuður var sá votasti í landinu í yfir fjörutíu ár en úrkoma í mánuðinum mældist yfir 140 millimetrar. Búist er við að ofankomunni sloti í dag og að veðurguðirnir verði hliðhollir landsmönnum í hreinsunar- og uppbyggingarstarfi sem nú fer í hönd.