Ólsarar töpuðu mikilvægum stigum

Víkingur Ólafsvík glutraði niður forskoti á heimavelli gegn Haukum í Inkasso-deild karla í kvöld. Lokatölur 2-2.

Haukarnir komust yfir með marki Elton Barros á 29. mínútu leiksins og þannig stóðu leikar allt þangað til að Kwame Quee jafnaði á 72. mínútu.


Kwame var ekki hættur því hann virtist tryggja Ólafsvíkingum sigurinn átta mínútum fyrir leikslok er hann kom Ólsurum í 2-1.

Indriði Áki Þorláksson var ekki á sama máli. Hann jafnaði fyrir Hauka fjórum mínútum fyrir leikslok og þar við sat. Lokatölur 2-2.

Ólsarar eru þó enn í öðru sætinu með 31 stig, stigi á eftir toppliði HK en öll liðin í kringum þó eiga leiki til góða.

Haukarnir eru í áttunda sætinu með fjórtán stig, með tveimur stigum meira en lið Magna sem er í fallsæti.