Þrír drepnir í skotárás í keilusal í Kaliforníu

Byssumaður skaut þrjá karlmenn til bana og særði fjóra aðra í keilusal í úthverfi Los Angeles-borgar í Kaliforníu. Skotárásin er sögð hafa komið í kjölfar slagsmála þar. Lögregla leitar nú árásarmannsins.

Árásin átti sér stað í Torrance, um fjörutíu kílómetrum suður af Los Angeles, að sögn Reuters-fréttastofunnar. Þrír voru úrskurðaðir látnir á staðnum.

Vitni segjast hafa séð slagsmál áður en skotum var hleypt af.

„Við hlupum bara inn á barinn og leituðum skjóls vegna þess að eftir slagsmálin heyrðum við „bang, bang!“ segir Jesus Perez, gestur á staðnum.