„Öllum var sama því við vorum svartar stelpur“

Fjöldi kvenna hefur undanfarin misseri stigið fram og sakað bandaríska R&B-tónlistarmanninn R Kelly um kynferðislegt, líkamlegt og andlegt ofbeldi.

Í byrjun janúar sýndi sjónvarpsstöðin Lifetime heimildarþættina Surviving R Kelly en í þeim er fjallað ítarlega um ásakanirnar sem komið hafa fram á hendur söngvaranum.

Það má hins vegar segja að það sé ekkert nýtt að Kelly sé sakaður um kynferðisbrot en svo virðist sem að almenningur sé fyrst núna að leggja við hlustir, ekki hvað síst vegna MeToo-byltingarinnar.

Átti að hafa gifst 15 ára stelpu

R Kelly hefur notið gríðarlegra vinsælda þrátt fyrir þrálátan orðróm um ofbeldisfull sambönd hans við konur og barnungar stelpur.

Þannig skrifaði hann og framleiddi fyrstu plötu söngkonunnar Aaliyah árið 1994, þegar hún var 15 ára. Greint var frá því að Kelly hefði gifst henni á laun þar sem það hefði brotið í bága við lög að giftast svo ungri stúlku. Sjálfur var Kelly þá 27 ára gamall en platan hét því kaldhæðnislega nafni Age Ain‘t Nothing but a Number.

Sagt var að Kelly og Aaliyah hefðu falsað fæðingardag hennar á hjúskaparvottorðinu en árið 1995 var hjónabandið svo ógilt. Aaliyah höfðaði síðan mál til þess að fá öllum gögnum varðandi hjónabandið eytt og síðar neituðu Kelly og Aaliyah því að þau hefðu nokkurn tímann verið gift.

Samdi utan dómstóla við fimm konur

Árið 1996 höfðaði Tiffany Hawkins svo mál gegn Kelly til greiðslu skaðabóta allt að tíu milljónum dollara.

Sakaði Hawkins söngvarann um að hafa beitt hana andlegu ofbeldi og haft við hana samræði þegar hún var 15 ára en þau voru saman í þrjú ár. Sambandið hófst þegar Hawkins var 15 ára og Kelly 24 ára. Samið var um málið utan dómstóla og greiddi Kelly Hawkins 250 þúsund dollara í bætur.

Kelly samdi utan dómstóla við fjórar aðrar konur sem sökuðu hann um ofbeldi á árunum 2001 til 2002. Ein þeirra sagðist hafa átt í ofbeldisfullu sambandi við söngvarann þegar hún var 17 ára og önnur kvaðst hafa orðið ólétt eftir hann þegar hún var undir lögaldri. Sagði hún Kelly hafa neytt hana til þess að fara í fóstureyðingu.

Gátu ekki fullyrt að Kelly væri maðurinn í myndbandinu

Árið 2008 kom Kelly síðan fyrir dómara í fyrsta og eina skiptið en hann var þá ákærður fyrir framleiðslu á barnaklámi.

Var talið að hann hefði sjálfur tekið myndefni af sér að misnota unglingsstúlku kynferðislega en á myndbandinu átti hann að sjást pissa á 14 ára gamla stúlku. Kviðdómur sýknaði Kelly þar sem hann taldi sig ekki geta fullyrt að maðurinn í myndbandinu væri söngvarinn vinsæli.

Það var svo árið 2017 sem fregnir fóru að berast af því að Kelly hefði heilaþvegið hóp kvenna og beitt þær harðræði og ofbeldi.

Sögðu foreldrar kvennanna að Kelly væri með þær í nokkurs konar sértrúarsöfnuði en söngvarinn var sagður halda konunum annars vegar í Chicago og hins vegar í Atlanta.

Lögregluyfirvöld í báðum borgunum hafa hafið rannsókn á Kelly vegna ásakana í hans garð um ofbeldi og misnotkun en söngvarinn hefur staðfastlega neitað öllu sem hann hefur verið sakaður um.

Catch this never before seen clip from #SurvivingRKelly. Watch the encore presentation tonight at 6/5c. pic.twitter.com/Zvq1P0bXdm

— Lifetime (@lifetimetv) January 11, 2019

„Tíminn er útrunninn“

Ein kvennanna sem steig fram í þáttunum Surviving R Kelly, Faith Rodgers, var spurð að því á blaðamannafundi í vikunni hvað hún vildi segja við söngvarann ef hann væri að hlusta.

„Tíminn er útrunninn,“ sagði Rodgers án þess að hika og vísaði þar í fjöldahreyfinguna Time‘s Up sem spratt upp í kjölfar MeToo og hefur það að markmiði að vinna gegn kynferðisofbeldi og kynferðislegri áreitni.

Fórnarlömbum Kelly þykir án efa tími til kominn að hann verði látinn svara til saka en margir velta því nú fyrir sér hvers vegna það tók svona langan tíma að ná ekki bara eyrum yfirvalda heldur samfélagsins alls.

Margir nefna vinsældir Kelly en aðrir húðlit þeirra kvenna sem ofbeldið beindist gegn en þær eru svartar.

„Fólk spyr hvers vegna enginn tók eftir þessu. Svarið er að það tóku allir eftir þessu. Öllum var sama því við vorum svartar stelpur,“ sagði Mikki Kendall, ein kvennanna sem steig fram í Surviving R Kelly.

Ekki „fyrirmyndarfórnarlömb“

Undir þetta tekur Treva Lindsey, prófessor við ríkisháskólann í Ohio, sem hefur rannsakað ofbeldi gegn svörtum konum.

„Þessar svörtu konur og stelpur voru ekki „fyrirmyndarfórnarlömb,““ segir Lindsey og bendir á að meinfýsi gegn þeim sé „normalíseruð“ og það byrji á toppnum, hjá sjálfum Bandaríkjaforseta.

„Sumar af illgjörnustu árásum Trump gegn einstaklingum hafa beinst að svörtum konum, til dæmis Maxine Waters og April Ryan,“ segir Lindsey.

Að hennar mati kristallast goðsögnin um að svartar konur séu svo kynferðislega virkar í máli Kelly.

„Þetta er svo rasísk saga, sérstaklega þegar kemur að kynferðisofbeldi. Svartir menn sem voru sakaðir um að nauðga hvítum konum voru hengdir án dóms og laga á meðan það var ekki refsivert að nauðga svörtum konum; það var ekki hægt að nauðga þeim,“ segir Lindsey og kveðst telja að þessi hugmyndafræði hafi ef til vill náð fótfestu á meðal svartra Bandaríkjamanna.

All allies in the fight against sexual violence must take a stand on this issue, and stand together in defense of women of color. #MuteRKellyhttps://t.co/TEa1MTliKT

— TIME'S UP (@TIMESUPNOW) January 9, 2019

Gæti verið ákærður fyrir ýmis brot

„Þessi orðræða „Æ, þessar stelpur vita alveg hvað þær eru að gera“ er hluti af því hvers vegna það verður síðan erfitt að sjá 14 ára svarta stelpu algjörlega sem fórnarlamb á myndbandi sem er álitið barnaklám,“ segir Lindsey.

Þá er samfélag svartra í Bandaríkjunum klofið vegna máls Kelly. Fjöldi fólks hefur lýst yfir stuðningi við hann, meðal annars með því að mæta í afmæli hans á klúbbi í Chicago í síðustu viku á sama tíma og mótmælendur komu saman við upptökuver hans í borginni.

„Mér er fokking sama um það sem er í gangi í kvöld,“ sagði Kelly við afmælisgestina.

Komist yfirvöld í Chicago og Atlanta að þeirri niðurstöðu að ásakanirnar á hendur Kelly um ofbeldi gegn konum og stúlkum eigi við rök að styðjast gæti hann átt verið ákærður fyrir ýmis brot, meðal annars að halda stúlkum nauðugum og að misnota stúlkur undir lögaldri kynferðislega. Hvort af ákærum verði á hendur söngvaranum á hins vegar eftir að koma í ljós.

Byggt á umfjöllun Guardian, Vulture og CNN.