Hótar að leggja efnahag Tyrklands í rúst

Donald Trump Bandaríkjaforseti hótar því að leggja efnahag Tyrklands í rúst, ráðist þeir gegn Kúrdum í Sýrlandi, eftir að Bandaríkjamenn draga herlið sitt til baka þar í landi eins og Trump hefur boðað.

Ákvörðun Trumps um að fara frá Sýrlandi hefur fallið í grýttan jarðveg víða, ekki síst hjá Kúrdum, sem hafa verið helstu bandamenn Bandaríkjamanna á svæðinu. Þeir óttast að Erdogan Tyrklandsforseti nýti sér tómarúmið til að ráðast inn á yfirráðasvæði Kúrda í Sýrlandi en Tyrkir líta á Kúrda sem hryðjuverkamenn og svarna óvini sína.

Trump brást við gagnrýninni á Twitter í gær þar sem hann hvatti Kúrda til að ögra ekki Tyrkjum, en varaði Tyrki líka við hörðum afleiðingum þess að ráðast inn á yfirráðasvæði Kúrda.