Ummæli Hatara um hernámið ollu uppnámi á fyrsta blaðamannafundinum

Liðsmenn Hatara sögðust vilja binda enda á hernám Ísraela á fyrsta blaðamannafundi sveitarinnar ytra í tengslum við þátttöku hennar í Eurovision. Myndband frá fundinum má sjá neðst í fréttinni.

Lungann úr fundinum voru spurningar spyrilsins sem stýrði blaðamannafundinum á léttu nótunum. Þegar líða tók á seinni hlutann var opnað fyrir spurningar blaðamanna úr sal en þá skapaðist mikil ringulreið.

Einn úr hópi blaðamannanna spurði hljómsveitina hvort hún hygðist gefa út yfirlýsingu sem hún hafði boðað og hvort hún myndi tengjast átökunum á milli Palestínu og Ísraels.

Matthías Haraldsson, annar tveggja söngvara Hatara, svaraði því til að hljómsveitin hygðist vissulega nýta dagskrárvaldið til að halda uppi gagnrýninni umræðu í tengslum við það samhengi sem keppnin er haldin í. Á sama tíma væru þau einnig staðráðin í því að taka þátt í keppninni og hlýða reglunum á hinu eiginlega sviði eins og allir aðrir.

Tók að ókyrrast er talið barst að átökum við Palestínu

Spyrillinn tók þá að ókyrrast og reyndi að stöðva frekari svör hljómsveitarmeðlima og sagði tímann vera á þrotum. Sami blaðamaður spurði þá aftur hvort hljómsveitin vildi eitthvað tjá sig nánar um hið eldfima ástand.

Átök hófust á föstudag þegar íbúar Gaza mótmæltu tálmunum sem Ísraelsher hafði komið upp. Hamasliðar hafa alls skotið um 450 eldflaugum yfir til Ísraels en Ísraelsher svaraði árásinni með loftárásum og stórskotahríð frá skriðdrekum.

Sjá einnig: Fyrstu æfingu Hatara í Tel Aviv lokið: „Ég man ekki eftir svona góðri fyrstu æfingu“

Þegar þarna var komið við sögu reyndi spyrillinn að koma í veg fyrir að blaðamaðurinn fengi að klára spurningu sína en Klemens Nikulásson Hannigan, hinn söngvari Hatara, bað um að blaðamaðurinn fengi að klára að orða spurningu sína.

Þá tók annar gestur fundarins til máls og spurði spyrilinn hvort henni fyndist ekki rétt að listamennirnir nytu tjáningarfrelsis.

„Jú, auðvitað. En ég held að þeir séu búnir að svara spurningunni,“ svaraði spyrillinn þá, þrátt fyrir að ekki hafi verið hægt að svara spurningunni þar sem blaðamaðurinn fékk ekki tækifæri til að bera hana upp í heild sinni. Á meðan á þessum skýringum spyrilsins stóð hvíslaði Klemens einhverju að Matthíasi, en ekki er ljóst hvað fór þeirra á milli.

 

Fékk skipanir um að stöðva fundinn

„Þeir vilja að ég stoppi núna, ef ég fæ skipun um að halda fundinum áfram þá getum við haldið áfram,“ sagði spyrillinn og í kjölfarið tók Hatrið mun sigra, lag Hatara í keppninni, að óma.

Í þann mund tilkynnti spyrillinn að henni hefði verið skipað af yfirboðurum sínum að ljúka fundinum. Ekki tókst þó að ljúka fundinum fyrr en Matthías hafði lýst því yfir að Hatari vonaðist til þess að sjá hernámi Ísraels á Palestínu lokið.

„Við viljum að sjálfsögðu sjá hernáminu ljúka eins fljótt og auðið er, og við bindum vonir við að friði verði komið á. Við erum vongóð.“

Fundinn í heild sinni má sjá í myndbandinu hér að neðan, en sá hluti fundarins er fréttin fjallar um hefst þegar um það bil 17 mínútur og 45 sekúndur eru liðnar af myndskeiðinu.