Enginn þáttur fengið eins góðar viðtökur

Þættirnir Tsjernóbíl hafa heldur betur slegið í gegn um allan heim að undanförnu en þeir eru byggðir eru á atburðum sem áttu sér stað árið 1986 í Tsjernóbíl í Úkraínu. Alls eru þættirnir fimm talsins og eru á dagskrá á Stöð 2 á þriðjudagskvöldum.

Fjórði þátturinn fór í loftið í gær og verður sá síðasti eftir tæplega viku. Tsjernóbíl er með hæstu einkunn í sögu vefsins IMDB en þegar þessi grein er skrifuð eru þeir með 9,7 í einkunn og hefur ekkert efni fengið þann dóm almennings áður í sögunni.

52.000 manns hafa gefið þeim einkunn en í öðru til þriðja sæti eru þættirnir Planet Earth II og Band of Brothers með 9,5.

Um er að ræða eitt stærsta kjarnorkuslys í sögunni þegar geislavirk efni sluppu út í andrúmsloftið og höfðu afdrifarík áhrif á umhverfið sem enn sér ekki fyrir endan á.

Þættirnir fjalla um sögu þeirra sem unnu í verinu, bjuggu í kring og þeirra sem unnu að því að sporna við frekari eyðileggingu. Með aðalhlutverk fara Jared Harris, Stellan Skarsgaard og Emily Watson en þess má geta að íslenski leikarinn Baltasar Breki fór með hlutverk í þáttunum.

Leikstjórn er í höndum Johan Renck (Breaking Bad) og Hildur Guðnadóttir sér um tónlistina en þeir koma úr smiðju HBO.