Rauð viðvörun vegna hitans

Líklegt er talið að hitamet verði slegið í Frakklandi síðar í dag en þá gæti hitinn farið vel yfir 44 gráður í landinu.

Fyrra met er 44,1 stig og hefur það staðið frá árinu 2003 þegar mikil hitabylgja gekk yfir landið þar sem þúsundir létu lífið vegna hitans.

Nú stefnir í svipað ástand og hefur franska veðurstofan í fyrsta sinn í sögu landsins sett efsta varúðarstig, rauða viðvörun, í gang í fjórum héruðum í suðurhluta landsins. Annars staðar í landinu er viðbúnaður á næsthæsta stigi.

Í öðrum Evrópulöndum er ástandið lítið skárra. Í Þýskalandi, Póllandi og Tékklandi hafa hitamet fyrir júnímánuð þegar verið slegin og í Katalóníu á Spáni berjast menn við mestu skógarelda í manna minnum.