Ágreiningur varð til þess að greiðslur fyrir eignir úr þrotabúi WOW drógust

Ágreiningur um einn af nokkrum samningum vegna kaupa á eignum úr þrotabúi WOW air varð til þess að greiðslur á fyrsta samningnum drógust. Þetta herma heimildir fréttastofu en fullyrt er í Viðskiptamogganum að greiðslur fyrir eignirnar hafi enn ekki borist.

Michele Ballarin, bandaríska athafnakonan sem hyggst endurreisa flugfélagið segist hafa tryggt félaginu sem hún kallar WOW 2 allt að hundrað milljónir Bandaríkjadala, eða um 12,5 milljarða íslenskra króna.

Ballarin lýsir fyrirætlunum sínum á Íslandi í viðtali við ViðskiptaMoggann í dag. Hún segist hafa heyrt af Íslandi í gegnum góða vini sína og viðskiptafélaga hér á landi og sjái mikla möguleika í staðsetningu landsins fyrir flugsamgöngur.

Sjá einnig: Ballarin segist hafa tryggt nýja WOW allt að 12,5 milljarða

Hún segist þess fullviss að WOW muni „nú rísa upp eins og fuglinn Fönix, eins fljótt og hægt er." Til þess hafi hún fengið að borðinu reynda aðila úr bandarískum flugheimi og horfi til viðskiptamódels bandaríska flugfélagsins SouthWest Airlines. Stofnað verði íslenskt fyrirtæki sem fara muni með 51% hlut í WOW 2 á móti 49% í bandarískri eigu. 

Höfuðstöðvar verði nálægt höfuðstöðvum WOW air í Katrínartúni en fyrirtæki Ballarin er byggt á trúarlegum grunni og er haft eftir henni að hún vilji hafa höfuðstöðvarnar nálægt Hallgrímskirkju. Þá verða þrjár vélar í flota nýja félagsins til að byrja með og segir Ballarin að áður en fyrsta vélin fari í loftið, muni hún fá hingað til lands biskupinn í Kirkju Jóhannesar skírara í Virginíu-ríki til að helga fyrsta flugið og flugfélagið

Nokkrir samningar um eignirnar

Ballarin kveðst hafa tryggt WOW 85 milljónir Bandaríkjadala, eða 10,5 milljarða íslenskra króna sem eigi að duga félaginu fyrsta árið. Talan geti þó hækkað ef þörf verði á, eða upp í allt að 12,5 milljarða króna.

Þá herma heimildir Moggans að greiðslur fyrir eignir úr þrotabúi WOW air hafi enn ekki borist en greint var frá því í Fréttablaðinu fyrr i þessum mánuði að viðskiptin væru frágengin. Þá staðfesti Sveinn Andri Sveinsson, annar skiptastjóri búsins það við blaðið á sínum tíma. 

Samkvæmt heimildum fréttastofu er um að ræða nokkra samninga um eignir úr þrotabúinu sem eru með mismunandi gjalddaga. Komið hafi upp ágreiningur um einhvern þeirra og greiðsluferlið á þeim fyrsta því dregist. 

Haft er eftir Ballarin í greininni að greiðslum sé að ljúka. Hinir keyptu hlutir séu margvíslegar rekstrarvörur, varahlutir, tæki og handbækur. Hún segir þó ekki tímabært að upplýsa um það hvað hún hafi borgað þrotabúinu fyrir WOW. 

Fleiri verðmætar eignir úr þrotabúinu til sölu

Þorsteinn Einarsson, annar skiptastjóri WOW, segist ekki geta tjáð sig um samningana. Hann segir jafnframt að þrátt fyrir að stór hluti eigna úr búinu hafi verið seldar séu enn verðmætar eignir í búinu sem séu til sölu. Til dæmis varahlutir og verkfæri. 

Ballarin lýsir jafnframt áhyggjum af uppgangi Asíuþjóða í Afríku, en hún hefur stundað mikil viðskipti í Sómalíu. Hún óttast þennan sama uppgang á Íslandi og segist vilja að Ísland verði áfram Ísland og í eigu Íslendinga. Þess vegna sé hún hingað komin til að fjárfesta í samgöngugeiranum.