"Þjóðvegurinn er dálítið eins og dansgólf“

Það styttist óðum í verslunarmannahelgina sem þýðir að framundan er ein stærsta ferðahelgi ársins. Viðbúið er að ansi margir verði á faraldsfæti um helgina enda spáð skaplegu veðri víða um land. Mikilvægt er að ökumenn sýni öðrum ökumönnum tillitssemi á þjóðveginum nú sem fyrr, gangi úr skugga um að ökutæki séu í góðu standi, láti áfengi alfarið vera áður en ekið ásamt ýmsu öðru sem þarf að hafa í huga að mati aðalvarðstjóri hjá umferðardeild lögreglunnar á höfuðborgarsvæðinu.

Árni Friðleifsson mætti í spjall í Bítið í morgun í tilefni þess að verslunarmannahelgin er framundan. Þar líkti hann þjóðveginum við dansgólf til þess að sýna fram á mikilvægi þess að tillitssemin yrði sett í fyrirrúm við aksturinn.

„Þjóðvegurinn er dálítið eins og dansgólf. Á dansgólfum er hægt að dansa vínarvals og rúmbu og tja tja tja. Allir þurfa sitt pláss og þetta er svipað með þjóðveginn. Við erum með stóra bíla, við erum litla bíla, við erum með mótorhjól. Við erum með bíla með hjólhýsi, við erum með reiðhjólamenn. Allir eru að nota sama dansgólf og það er ekkert stórt. Það þurfa allir sitt pláss. Ef að við ætlum að vera dansfélagar á veginum þá verðum við að taka tillit til allra,“ sagði Árni aðspurður um hvað ökumenn þyrftu að hafa í huga fyrir helgina.

Sjá einnig: Tuttugu við­burðir sem hægt er að sækja um verslunar­manna­helgina

Þetta ætti sérstaklega við um helgina enda mætti gera ráð fyrir að margir verði á ferðinni með hjólhýsi og aðra ferðavagna til þess að komast í útileguna.

„Einhvern veginn er þetta hrærigrautur á þjóðvegakerfi sem er ekkert rosalega stórt þannig að þetta er það sem við þurfum að spá í að leyfa öllum að fá sitt pláss,“ sagði Árni en hlusta má á spjallið við hann hér fyrir neðan.

Það komast allir sinnar leiðar á endanum

Reikna má með að umferð verði þung víða um land enda mikið um að vera úti um allt land um helgina. Bað Árni ökumenn um að sýna þolinmæði og tók dæmi um einn stað á höfuðborgarsvæðinu þar sem búast má við að umferðarteppa myndist. Þar gæti orðið mikilvægt að sýna þolinmæði.

„Til að mynda þegar við förum úr bænum hérna upp í Mosfellsbæ. Þar er einbreitt á kafla við Skarhólabraut. Þar verður alltaf tappi. Fólk verður bara að taka því. Það komast allir á leiðarenda,“ sagði Árni.

Talið barst einnig að símanotkun í umferðinni en þann 1. maí 2018 hækkuðu sektir vegna símanotkunar undir stýri úr fimm þúsund krónum í 40 þúsund krónur. Átak lögreglunnar í þessum efnum hefur leitt af sér tvöfalt fleiri sektir vegna notkunar farsíma undir stýri.

Árni sagðist telja að árangur hafi náðst í því að minnka símanotkun undir stýri en gera mætti betur. Brýndi hann fyrir ökumönnum að geyma símann meðan ekið er, enda gæti símanotkun við stýrið haft alvarlegar afleiðingar.

„Ökumenn hafa viðurkennd í umferðarslysum, alvarlegum umferðarslysum, að hafa verið í símanum og jafnvel verið inn á samfélagsmiðlum, skoða tölvupóstinn,“ sagði Árni. „Við höfum stöðvað ökumenn sem hafa jafnvel verið að horfa á þætti, Netflix. Það er allur gangur á þessu. Því miður er þetta of algengt.“

Athuga ástand ökutækja, spenna beltin og alls ekki keyra eftir að hafa smakkað áfengi

Einnig væri mikilvægt að hafa aðra hluti í huga áður en ekið væri af stað um helgina.

„Ökutækin verða að vera í góðu standi. Fólk sem er á bílum eða einhverjum farartækjum þar sem hugsanlega ískrar í bremsum og svona. Við erum fullorðið fólk og verðum að bera ábyrgð. Menn eiga ekki að leggja af stað í svoleiðis aðstæðum. Mér finnst einhvern veginn að ég þurfi ekki að taka það fram að það er bílbeltaskylda á Íslandi. Það er komið 2019 og þetta á að vera ósköp eðlilegt að þú setjir á þig beltið. Þetta er jafn eðlilegt og að þú opnir augun á morgnana þegar þú vaknar,“ sagði Árni.

Búast má við að víða verði áfengi haft um hönd um helgina og voru skilaboðin frá Árna í tengslum við þá staðreynd skýr.

„Það á enginn að keyra eftir að hafa smakkað áfengi.“