Flugbjörgunarsveitarmaður til Pipar/TBWA

Friðrik Gunnar Kristjánsson hefur verið ráðinn til auglýsingastofunnar Pip­ar\TBWA. Þar mun hann sinna starfi vefbirtinga og samfélagsmiðlaráðgjafa.

Friðrik starfaði áður sem sérfræðingur í markaðsmálum hjá atvinnuleitarmiðlinum Alfreð og þar áður sem markaðsstjóri hjá Heimkaup, að því er fram kemur í tilkynningu þar sem greint er frá ráðningu hans.

Þar eru áhugamáls hans jafnframt rakin; útvist, bílar, ferðalög og flugvélar eru sögð eiga hug hans allan - „sem endurspeglast í því að hann er með einkaflugmannsréttindi og er björgunarsveitarmaður hjá Flugbjörgunarsveitinni í Reykjavík. Þar er hann sérhæfður leitarmaður í straumvatnsbjörgun. Hann stýrir dróna með hitamyndavél og sér einnig um flota breyttra björgunartækja Flugbjörgunarsveitarinnar,“ að því er segir í tilkynningunni.