Nauðsynlegur sigur Stólanna á heimavelli

Tindastóll vann tólf stiga sigur á Þór Akureyri, 89-77, er liðin mættust í fimmtu umferð Dominos-deildar karla í Síkinu í kvöld.

Nýliðarnir frá Akureyri gáfu ekki tommu eftir í kvöld og héldu í við ógnarsterkt lið Tindastóls. Staðan eftir fyrsta leikhluta var 23-21 og staðan í hálfleik, 36-34, Tindastól í vil.

Stigaskorið hækkaði aðeins í þeim síðari en Stólarnir héldu alltaf góðum tökum á leiknum og unnu að endingu með tólf stiga mun, 89-77.

Sinisa Bilic var stigahæstur hjá Tindastól. Hann skoraði 23 stig, tók sex fráköst og gaf tvær stoðsendingar. Jaka Brodnik gerði 19 stig og tók átta fráköst.

Hansel Suarez gerði 18 stig hjá Þór Akureyri sem og Pablo Montenegro. Hansel gaf átta stoðsendingar og Pablo tók sex fráköst.

Tindastóll er nú með þrjá sigra í fyrstu fimm leikjunum og eru um miðja deild en Þór Akureyri er stigalaust á botninum.