Conor klár í að berjast gegn De La Hoya

Á dögunum steig hnefaleikakappinn Oscar De La Hoya fram í viðtali og sagði að hann myndi 100% vinna gegn UFC-kappanum, Conor McGregor, myndu þeir mætast í boxhringnum.

Hann skoraði að sama skapi á Írann og hinn kjaftforsi Conor var ekki lengi að svara bardagakappanum því Conor greindi frá því á Twitter-síðu sinni fyrr í dag að hann væri tilbúinn í þessa áskorun frá De La Hoya.

Conor hefur einu sinni áður barist í boxhringnum en hann tapaði þá gegn Floyd Mayweather. Conor barðist seinast 18. janúar þegar hann rotaði Donald Cerrone á 40 sekúndum.

Það verður því fróðlegt að fylgjast með framvindu mála og hvort að þessir tveir miklu bardagamenn munu mætast í boxhringnum á árinu en De La Hoya er einn sigursælasti bardagamaður sögunnar.