Óttast að spítalar Sao Paulo verði yfirfullir innan tveggja vikna

Bruno Covas, borgarstjóri Sao Paulo stærstu borgar Brasilíu og einnar stærstu borgar heims, segir að heilbrigðiskerfi borgarinnar sé á barmi þrots en kórónuveiran herjar nú á borgarbúa af miklum móð. Covas segist óttast að innan tveggja vikna verði allir spítalar orðnir yfirfullir.

Veiran hefur verið sérstaklega skæð í Sao Paulo þar sem um 3000 manns hafa þegar látið lífið en á laugardaginn fór Brasilía fram úr Spáni og Ítalíu og er nú í fjórða sæti yfir lönd sem eru með flest staðfest smit, á eftir Bandaríkjunum, Rússlandi og Bretlandi.

Heilbrigðisyfirvöld hafa þó lengi varað við því að smit séu enn fleiri í Brasilíu, í ljósi þess hve lítið hafi verið prófað fyrir veirunni.

Í Sao Paulo virðist fólk almennt ekki fara eftir reglum um fjarlægðartakmörk og Covas borgarstjóri kallar nú eftir útgöngubanni.

Til þess þarf hann stuðning ríkisstjóra Sao Paulo og Bolsonaros forseta, sem hingað til hefur gert lítið úr vandamálinu og gagnrýnt fjarlægðarreglur og samkomubann.