Hálfan milljarð vantaði upp á og þörf íþróttafélaganna aukist

Alls bárust ÍSÍ umsóknir um yfir 700 milljónir króna frá íþróttafélögum og sérsamböndum vegna fjárhagslegs tjóns af völdum kórónuveirufaraldursins í vor. ÍSÍ hefur hins vegar 150 milljónir til að deila út.

Mennta- og menningarmálaráðuneyti fól í vor ÍSÍ að greiða út bætur til íþróttastarfs vegna afleiðinga samkomubanns. ÍSÍ skipaði vinnuhóp sem lagði til að það yrði gert með almennum aðgerðum og sértækum. Í almennu aðgerðunum voru 300 milljónir króna greiddar til íþrótta- og ungmennafélaga, án þess að leggja þyrfti fram umsóknir. Þar var byggt á iðkendafjölda 6 til 18 ára, fjölda íþróttagreina hjá félagi og veltu félagsins. Fjölnir fékk til að mynda hæsta styrkinn eða 18,5 milljón.

Eftir standa 150 milljónir í sértækar aðgerðir en umsóknarfrestur um hlut í þeirri fjárhæð rann út 19. júní. Ljóst er að hið fjárhagslega högg fyrir íþróttafélög hefur aukist mikið síðan þá.

Sértæku aðgerðirnar eiga að gagnast íþróttafélögum sem ekki gátu haldið viðburði, mót eða keppnir vegna faraldursins. Ljóst er til að mynda að handbolta- og körfuboltafélög urðu af miklum tekjum eftir að úrslitakeppnir voru slegnar af.

Fjárþörf íþróttahreyfingarinnar er mun meiri en 150 milljónir, jafnvel þó að ekki sé horft til fleiri þeirra viðburða sem verið er að fella niður núna eða á síðustu vikum. Starfshópur ÍSÍ, undir forystu Guðrúnar Ingu Sívertsen fyrrverandi varaformanns KSÍ, vonast til að skila af sér tillögum um útdeilingu fjár í sértæku aðgerðunum í næstu viku en það er svo í höndum framkvæmdastjórnar ÍSÍ að taka lokaákvörðun.

„Umsóknarfrestur rann út 19. júní og er vinnuhópurinn að leggja lokahönd á tillögur sínar að úthlutun. Margt hefur breyst frá því í júní og önnur bylgja faraldursins hefur haft áhrif á allt íþróttastarf í landinu. Þeir viðburðir eru ekki inni á borði hjá okkur í þessari úthlutun. Ég vonast því til að það komi frekara fjármagn til íþróttahreyfingarinnar svo að hægt verði að bregðast við. Þörfin er sannarlega til staðar,“ segir Guðrún Inga við Vísi. Engin ákvörðun hefur þó verið tekin um frekari stuðning ríkisins við íþróttahreyfinguna.

Ekki of flókið að sækja um ÍSÍ monní

Blaðamaður hefur orðið var við óánægju með það í íþróttahreyfingunni hve flókið hafi verið að sækja um styrk vegna sértækra aðgerða. Skila þurfti inn ýmsum gögnum og áætlunum, og hafa má í huga að sú vinna er í mörgum tilfellum í höndum sjálfboðaliða.

„Vinnuhópurinn lagði áherslu á í tillögum sínum að almenna aðgerðin yrði ekki á neinn hátt íþyngjandi fyrir félögin en þar voru greiddar út 300 milljónir 18. maí. Í þeim aðgerðum var notast við upplýsingar sem til voru og því þurftu félögin ekki að sækja sérstaklega um eða skila inn gögnum. Við lögðum áherslu á að þeir peningar færu hratt út í hreyfinguna til að bregðast strax við.

Sértæku aðgerðirnar voru kynntar sem aðgerðir til að bæta einstaka tjón og því var nauðsynlegt að kalla eftir viðeigandi gögnum til að geta metið umfangið. Með umsókn þurfti að skila inn meðal annars ársreikningi síðasta árs, fjárhagsáætlun og sérstökum upplýsingum um þá viðburði sem sótt var um. Það var mat vinnuhópsins að fara þessa leið,“ segir Guðrún Inga.

Umsóknirnar tæplega hundrað talsins

Einnig hefur gætt óánægju með þann tíma sem það hefur tekið að klára sértæku aðgerðirnar en Guðrún Inga segir það eiga sínar skýringar.

„Umsóknirnar voru tæplega 100 og fara þurfti ítarlega yfir hverja og eina. Í sumum tilvikum kölluðum við eftir viðbótargögnum og gáfum þá tveggja vikna frest til að verða við því. Sá frestur rann út núna eftir verslunarmannahelgina. Auðvitað væri gott að geta unnið þetta á nokkrum dögum en það þarf líka að vanda til verka.“