Átak í eldvörnum um allt land

Húsnæðis- og mannvirkjastofnun hefur ýtt úr vör átakinu Eldklár. Markmiðið er að fræða landsmenn alla um brunavarnir og vekja fólk til umhugsunar.

„Ástæða þess að við förum af stað með átakið er augljós en það hafa orðið alvarlegir brunar upp á síðakastið, mannskæðir brunar sem mikið hefur verið fjallað um og við skynjum ótta og óhug í samfélaginu. Því viljum við grípa inn í með fræðslu og forvörnum í formi þessa átaks því brunavarnir heimafyrir eru grundvallaratriði. Í öðru lagi er mikið álag á slökkviliði landsins og með átakinu vonumst við einnig til að draga úr álaginu,“ segir Eyrún Viktorsdóttir, forvarnarfulltrúi brunavarna hjá Húsnæðis- og mannvirkjastofnun.

Átakið fer þannig fram að fólk skráir þátttöku inni á heimasíðunni hms.is/eldklár eða á facebook. Þátttakendur fá sendan gátlista með þeim grundvallar brunavörum sem eiga að vera á hverju heimili. Síðan er farið yfir heimilið með gátlistann og hakað við það sem er í lagi. Ef einhverju þarf að bæta úr eru fræðslumyndbönd og upplýsingar inni á hms.is

„Gátlistarnir eru almennir en einnig er hægt að sækja sérhæfðari fræðslu á heimasíðunni okkar, eftir því í hvernig húsnæði viðkomandi býr. Er til dæmis um einbýli að ræða, fjölbýli eða timburhús? Ólík viðmið geta gilt um mismunandi húsnæði,“ útskýrir Eyrún. „Þá fylgjum við þátttakendum eftir með því að senda reglulegar áminningar því það er auðvelt að gleyma sér.

Nú er aðventan gengin í garð og landsmenn kveikja á kertum og skreyta heimilin jólaljósum. Sérstaka aðgát þarf því að viðhafa í jólamánuðinum en Eyrún segir Eldklár ekki hugsað sem tímabundið átak.

„Við setjum enga endadagsetningu á þetta. Við leggjum áherslu á heimilin núna og svo í framhaldinu tökum við opinberar byggingar, skrifstofur, veitingastaði og svo koll af kolli. Við ætlum okkur að koma brunavörunum alls staðar í lag og eldklár verður fastur hluti af þjónustu Húsnæðis- og mannvirkjastofnunar næstu árin.“