Fékk kær­komna stað­­festingu á að í sér renni blóð

„Úps, heyrðu nú bara blæðir þér út,“ grínaðist hún við ráðherrann sem sýndi engin svipbrigði vegna þessarar lítilvægu uppákomu. 

„Nú látum við ríkið splæsa á þig plástri!“

Fréttastofa náði tali af ráðherranum eftir örvunarbólusetninguna:

Hvernig er tilfinningin?

„Heyrðu hún er bara góð. Það hefur sýnt sig að þetta hjálpar okkur í baráttunni,“ sagði Willum Þór Þórsson.

Spurður út í óhappið við sprautuna fagnaði hann því. Fór eitthvað úrskeiðis þarna?

„Nei, ég bara var svo ánægður að fá staðfestingu á því að það renni í manni blóðið.“ Þannig þetta var ekki vont? „Nei, nei.“

Ertu vel örvaður núna?

„Já, ég finn það. Þetta er strax að skila sér.“

Rannsóknir hafa sýnt það að örvunarbólusetning minnkar mjög líkurnar á smiti og ver vel gegn þekktustu afbrigðum veirunnar. Enn er þó allt á huldu um virkni þess gegn nýja omíkron-afbrigðinu.

„Nú margfaldast stuðullinn. Fyrst og fremst er ég nú svo fullur aðdáunar á því hvað þetta gengur vel og hvað þetta frábæra fólk sem er að vinna þetta gerir þetta vel,“ sagði Willum.