Prins Nutella tróð upp í eins árs afmæli

Einn eigenda Verzlanahallarinnar segir rekstur fyrsta ársins hafa gengið framar óskum og ánægjulegt sé að sjá hvernig hlutir og fatnaður sem fólk vill losna við verður öðrum fjársjóður.

Fyrir ári síðan opnuðumæðgurnar Vilborg Norðdal, Þórdís V. Þórhallsdóttir og Sveindís Anja V. Þórhallsdóttir Verzlanahöllina að Laugavegi 26 með 166 bása á 500 fermetra svæði. Þar eralltendurnýtt, líka nafnið, því að á sama stað var á 20. öld verslun með sama nafni. 

Á afmælisdeginum í gær var einnig hægt að fræðast og spjalla við fólk frá Kattaskránni og Dýrahjálp, en samtökin eru með fasta bása í fjáröflunarskyni. Baldvin Tómas tók lagið seinni partinn og trúbadorinn Bóas Gunnarsson söng seinna um kvöldið.

Þórdís, sem er viðskiptafræðingur, segir reksturinn hafa gengið framar óskum og í raun sé líklega ekki til kennslubók um það. 

„Við vildum vera hér miðsvæðis því hér er bíllaus lífsstíll algengur og fólk sem er umhverfismeðvitað. Okkar básaleigjendur búa víða um land, s.s. Ólafsfirði, Akranesi, Grindavík og Reykjanesbæ. Við sendum líka út á land og erum meira að segja með fastakúnna á Skagaströnd, í Borgarnesi og í Neskaupstað af því að það er hægt að símgreiða.

Hundar kunna vel við sig og draga eigendur inn

Spurð um eitthvað sérstaklega áhugavert segir Þórdís að margar konur sem starfa í viðskiptalífinu hafa verið með rándýrar dragtir á spottprís og ungar konur hafi síðan keypt t.d. buxurnar og klæðst jafnvel sjúskuðum leðurjakka á móti. Báðar týpur séu jafn flottar í drögtunum. 

„Við seldum líka antík-hnakk sem kom úr dánarbúi móður manns sem er um sjötugt. Úr því dánarbúi voru hlutir allt að 200 ára gamlir. Ég hvet fólk til að koma bara með allt mögulegt því það er alltaf þannig að það sem einhverjum finnst einskis virði finnst öðrum fjársjóður.“

Einnig hefur komið eigendum Verzlunarhallarinnar á óvart hversu margir ókunnugir hafa verið með þeim í liði er varðar það sem þau standa fyrir. 

„Við höfum eignast mjög góða vini sem hafa verið hér með bása. Hundar eru einnig sérstaklega velkomnir og við þekkjum oft hundana betur en eigendurna. Sumir hundanna eiga það til að kunna svo vel við sig hérna að þeir draga eigendur bókstaflega með sér. Einn gerði það þrjá daga í röð,“ segir Þórdís og hlær.