Hollywood-endir þegar Hrútarnir frá LA unnu Super Bowl

Hrútarnir voru að vinna sinn fyrsta NFL-titil í 22 ár og þann fyrsta síðan þeir fluttu sig yfir til Los Angeles en þeir Rams liðið vann titilinn 2000 þá með aðsetur í St. Louis.

Það var stjörnuframmistaða stjörnuútherja tímabilsins Cooper Kupp þegar mest á reyndi og frábær vörn með Aaron Donald í fararbroddi sem skilaði þessum endurkomusigri. Bengals var í mjög góðri stöðu í leiknum og gekk vel að verjast Rams fram eftir leik. Það breyttist í lokin.

Rams liðið missti einn sinn besta leikmann meiddan af velli en draumabyrjun Odell Beckham Jr. breyttist snögglega í martröð þegar hann meiddist í fyrri hálfleiknum og það tók sóknarleik Los Angeles langan tíma að jafna sig á því. Hlaupaleikurinn gekk ekkert og því var eina leiðin að treysta því sem skilaði svö mörgum góðum hlutum á leiktíðinni.

Cooper Kupp var magnaður í vetur og hann var heldur betur magnaður á lokakafla leiksins. Kupp skoraði á endanum sigursnertimarkið einni og hálfri mínútu fyrir leikslok. Lokasóknin snerist um hann og hann greip þá hvern boltann á fætur öðrum.

Kupp var valinn mikilvægasti leikmaður úrslitaleiksins en á föstudaginn hafði hann verið kosinn besti sóknarmaður tímabilsins. Það er góð leið til að halda upp á slík verðlaun með að sýna fram á virði sitt á allra stærsta sviðinu.

Kupp endaði leikinn með tvö snertimörk og 92 jarda eftir gripna bolta. Leikstjórnandinn Matthew Stafford átti þrjár snertimarksendingar en Rams sóknin þurfti að treysta á hendi hans þar sem hlaupararnir komust aðeins 43 jarda samanlagt með boltann í leiknum.

Leikurinn byrjaði frábærlega fyrir Rams-útherjann Odell Beckham Jr. sem skoraði fyrsta snertimark leiksins en Bengals mönnum tókst að svara með vallarmerki eftir 46 jarda lykilgrip frá Ja'Marr Chase í sókninni.

Matthew Stafford var að finna báða stjörnuútherja sína framan af leik því Cooper Kupp kom Rams liðinu í 13-3 með laglegu snertimarki snemma í öðrum leikhluta.

Bengalsmönnum tókst að svara með sínu fyrsta snertimarki en það kom þó ekki eftir sendingu frá leikstjórnandanum Joe Burrow. Brellukerfi bauð upp á sendingu frá hlauparanum Joe Mixon og snertimark hjá Tee Higgins.

Hálfleikurinn, sem byrjaði svo vel fyrir Beckham, breyttist fljótt í martröð þegar hann meiddist á vinstra hné þegar enginn var nálægt.

Í fyrstu sókninni eftir meiðslin kastaði Matthew Stafford boltanum frá sér en Bengals tókst á móti ekki að nýta sína lokasókn í hálfleiknum. Rams leiddi því með þremur stigum í hálfleik, 13-10.

Það tók aftur á móti aðeins nokkrar sekúndur fyrir Bengals að koma yfir í upphafi seinni hálfleiks og vinna svo boltann aftur. Tee Higgins skoraði 75 jarda snertimark eftir tólf sekúndur og tíu sekúndum síðar voru varnarmenn Bengals búnir að komast inn í sendingu frá Stafford. Stafford var þannig búinn að kasta boltanum tvisvar sinnum frá sér eftir að Beckham fór meiddur af velli.

Snertimark Higgins, var hans annað í leiknum, en var um leið umdeilt því hann virtist brjóta af sér til að losa sig við varnarmanninn snjalla Jalen Ramsey.

Annað vallarmark frá sparkaranum Evan McPherson kom Bengals síðan sjö stigum yfir, 20-13, og nú var pressan öll á Rams mönnum. Vallarmark minnkaði muninn í fjögur stig og lítið var að frétta í sóknarleik Bengals.

Samvinna Matthew Stafford og Cooper Kupp hefur verið frábær í vetur og þjálfarar Rams treystu á hana í lok leiksins. Þar skilaði mörgum gripnum boltum og loks snertimarki Kupp þegar 89 sekúndur voru eftir af leiknum. Rams liðið var komið yfir, 23-20.

Nú voru augu allra á Burrow sem þurfti að fara upp völlinn með lið sitt þegar rétt rúm mínúta var eftir af leiknum. Það tókst ekki, Rams-vörnin stóð sína vakt og lokasóknin varð að engu.