Innlent

Ráðherra vill bíða með nýjan kennslu- og æfingaflugvöll

Kristján Már Unnarsson skrifar
Sigurður Ingi Jóhannsson innviðaráðherra. 
Sigurður Ingi Jóhannsson innviðaráðherra.  Ívar Fannar Arnarsson

Níu árum eftir að ríkið skrifaði upp á samkomulag um að finna kennslu- og einkaflugi nýjan stað eins fljótt og verða mætti bólar ekkert á efndum. Borgin þrýstir á að fá Fluggarða í Vatnsmýri undir aðrar húsbyggingar en innviðaráðherra segist vilja bíða eftir niðurstöðum Hvassahraunsnefndar.

Fjallað var um málið í fréttum Stöðvar 2 en Fluggarðar eru helsta uppeldisstöð íslenskra flugmanna, með flugskólum og flugklúbbum. Á svæðinu eru jafnframt þær flugvallarbyggingar sem næstar er Háskóla Íslands og miðborg Reykjavíkur.

Reykjavíkurborg gerir í nýju aðalskipulagi ráð fyrir að Fluggarðar víki árið 2024.Grafík/Ragnar Visage

Þegar Sigurður Ingi Jóhannsson innviðaráðherra lýsti því yfir í síðustu viku að borgin fengi ekki meira af landi flugvallarins fyrr en nýr flugvöllur væri tilbúinn spurðum við hvort það ætti einnig við um svæði Fluggarða.

Í samkomulagi frá 2019, sem ráðherrann sagði að þyrfti að standa við, er nefnilega sérstaklega tekið fram að það víki ekki til hliðar samkomulagi frá árinu 2013 um að ríkið hafi forgöngu um að kennslu- og einkaflugi skuli fundinn nýr staður í nágrenni borgarinnar. Í eldra samkomulaginu, sem vísað er til, segir að stefnt skuli að því að framkvæmdir verði hafnar eins fljótt og verða má.

Hanna Birna Kristjánsdóttir innanríkisráðherra og Jón Gnarr borgarstjóri gerðu samkomulagið árið 2013 um að nýr flugvöllur skyldi byggður í nágrenni borgarinnar fyrir kennslu- og einkaflug eins fljótt og verða má.Grafík/Ragnar Visage

„Það er gamalt samkomulag sem við erum að reyna að efna um kennslu- og æfingaflug. Það auðvitað hangir svolítið á því að auðvitað væri ekkert vit í að fara að setja það „eitthvað“ annað,“ sagði Sigurður Ingi og kvaðst vilja bíða niðurstöðu Hvassahraunsnefndar.

„Það styttist í hana. Áður en við förum að taka annarsvegar ákvarðanir um einhverjar uppbyggingar eða skylmast, þó svo að það séu kosningar í nánd. Samkomulag á að virða.“

Nýsamþykkt aðalskipulag Reykjavíkur gerir ráð fyrir tímabundinni heimild Fluggarða til ársins 2024. Eftir það fái borgin landið til annarra nota.

Ríki og borg kanna nú hvort raunhæft sé að gera nýjan flugvöll í Hvassahrauni.Skjáskot/Stöð 2

Eftir að athuganir hófust á nýju flugvallarstæði í Hvassahrauni hófst óratímabil á Reykjanesskaga með öflugum jarðskjálftum, eldgosi í Fagradalsfjalli og nokkrum kvikuinnskotum. En finnst Sigurði Inga einhverjar líkur á því að flugvöllur verði gerður í Hvassahrauni?

„Sjálfum finnst mér það nú einhvern veginn hljóma sérkennilega. En ég ætla að bíða eftir niðurstöðum Veðurstofunnar um það áhættumat.“

Þá sé einnig að vænta niðurstaðna úr flugmælingum og veðurathugunum vorið 2023.

„Og ég held að við eigum að bíða niðurstöðu þeirrar vinnu,“ segir Sigurður Ingi Jóhannsson innviðaráðherra.

Hér má sjá frétt Stöðvar 2:

Reykjavíkurflugvöllur Fréttir af flugi Borgarstjórn Reykjavík Skipulag

Tengdar fréttir

Ráðherra neitar að afhenda landið en borgarstjóri segist hafa afsalið

Innviðaráðherra neitar borginni um að byggja í Skerjafirði og segir að hún fái ekki meira af landi Reykjavíkurflugvallar fyrr en nýr flugvallarkostur sé fundinn og uppbyggður. Borgarstjóri hafnar því að flugöryggi verði raskað og minnir á að borgin eigi landið.

Flugvallarstæði í Hvassahrauni á hættusvæði

Samgönguráðherra segir að ef umbrotin á Reykjanesi leiði til eldgoss kalli það á endurmat á Hvassahrauni sem flugvallarkosti. Sérfræðingar segja Hvassahraun á hættusvæði, fari að gjósa.

Reykjavíkurflugvöllur óáreittur næstu 15-20 árin

Reykjavíkurflugvöllur mun áfram þjóna innanlandsflugi, æfinga- og kennsluflugi næstu fimmtán til tuttugu árin en á næstu tveimur árum á að liggja fyrir hvort aðstæður leyfi uppbyggingu nýs innanlandsflugvallar í Hvassahrauni.

Mest lesið


Fleiri fréttir

Sjá meira


×

Mest lesið