Putin segir sókn Rússa stöðuga og samkvæmt áætlun

Aðildarríki Atlantshafsbandalagsins hétu Úkraínu auknum hernaðarstuðningi á leiðtogafundi bandalagsins í gær. Þannig ætla Bretar að auka framlög sín um einn milljarð punda, eða um rúmlega 160 milljarða króna.

Liz Truss utanríkisráðherra Bretlands hefur verið einn einarðasti stuðningsmaður Úkraínu og talskona þess að Rússum verði mætt af fullkominni hörku. Hún fagnar aðild Svía og Finna að NATO. Hlutlausra þjóða til áratuga sem gerðu sér nú grein fyrir þeirri ógn sem stafaði af Rússum.

„Þannig að Putin sem vildi draga úr mætti NATO situr nú uppi með sterkara NATO,“ sagði Truss á leiðtogafundinum í Madrid í morgun.

Vladimir Putin forseti Rússlands sótti leiðtogafundi bandalags þjóða við Kaspíahaf í Turkmenistan í gær. Hann segir NATO beita Úkraínu fyrir sig til að uppfylla heimsveldisstefnu Vesturlanda. Rússland ætti ekki í sams konar landfræðilegum deilum við Finnland og Svíþjóð og þeir ættu því miður í við Úkraínu.

Forsetinn segir sókn rússneskra hersveita ganga hægt og örugglega og þær næðu settum markmiðum á hverju stigi innrásarinnar, sem hann kallar auðvitað sérstaka hernaðaraðgerð. Allt gengi samkvæmt áætlun og óþarfi að setja aðgerðunum einhver tímamörk.

Þá þvertók Putin fyrir að Rússar gerðu árásir á borgaraleg skotmörk eins og verslunarmiðstöðina í Kremenchuk.

„Rússneski herinn ræðst ekki á borgaraleg skotmörk. Við þurfum þess ekki. Við höfum alla möguleika á að finna út hvað er hvar, með nákvæmum nútíma og langdrægum vopnum. En auðvitað mun ég kanna málin nánar þegar ég kem til baka til Moskvu," sagði Putin og lét eins og hann vissi lítið um eldflaugaárásina á verslunarmiðstöðina á mánudag.

Liz Truss segir að hunsa beri yfirlýsingar Putins sem hafi hótað Vesturlöndum öllu illu ef þau útveguðu Úkraínu vopn.

„Við eigum að láta orð hans eins og vind um eyru þjóta og gera allt sem við getum til að styðja Úkraínu með þeim vopnum sem nauðsynleg eru til að vinna þetta ömurlega stríð. Ef við gerum það ekki verður ógnin við öryggi Evrópu enn meiri í framtíðinni,“ sagði Liz Truss.