Fótbolti

„Þetta var draumi líkast“

Runólfur Trausti Þórhallsson skrifar
Sandra Sigurðardóttir stóð vaktina í marki Íslands í dag.
Sandra Sigurðardóttir stóð vaktina í marki Íslands í dag. Vísir/Vilhelm

Markvörðurinn Sandra Sigurðardóttir spilaði sínar fyrstu mínútur fyrir Íslands hönd á stórmóti er liðið gerði 1-1 jafntefli við Belgíu í dag. Sandra var hins vegar að mæta til leiks á sitt fjórða stórmót en þangað til nú hefur hún þurft að verma varamannabekk Íslands.

„Hún var bara ótrúlega góð. Leið vel og ótrúlega stolt að vera á þessum stað,“ sagði Sandra um tilfinninguna að spila loks sínar fyrstu mínútur og hélt svo áfram.

„Bara geggjað, þetta var draumi líkast. Augnablik sem maður er búinn að bíða eftir í langan tíma og ótrúlega ánægð með alla Íslendinga mættu og voru að hvetja, við áttum þessa stúku – það er alveg klárt.“

„Já, samt bara eðlilegt. Ég furðaði mig á því í byrjun leiks að ég væri ekki jafn stressuð og héldi að ég myndi vera. Er náttúrulega búin að vera í þessu í langan tíma þannig að ég var tilbúin fannst mér,“ sagði Sandra aðspurð hvort það hefði verið smá stress fyrir leik.

Cecilía Rán Rúnarsdóttir, fingurbrotnaði á æfingu skömmu fyrir leik, og var Sandra spurð út í það.

„Þetta er náttúrulega ótrúlega súrt. Sérstaklega fyrir hana en líka fyrir okkur því við erum teymi og æfum mikið saman, gerum þetta saman og stöndum þétt við bakið á hver annarri þannig þetta var gríðarlega svekkjandi.“

Um vítið sem Belgía skoraði úr hafði Sandra eftirfarandi að segja:

„Að mig langaði að verja þetta. Það tókst ekki, ég var búin að skoða einhverjar klippur og tók sénsinn en hún gerði þetta bara vel. Maður getur ekki bara stólað á klippur, maður verður að reyna lesa þetta og hún gerði vel, var sultuslök og kláraði þetta. Það er eins og það er.“

„Við tökum þetta stig með okkur og það vonandi gefur okkur klárlega eitthvað. Svo stefnum við á þrjú stig á fimmtudaginn, engin spurning,“ sagði Sandra Sigurðardóttur, aðalmarkvörður Íslands, að lokum.

Klippa: Viðtal við Söndru eftir leik
Landslið kvenna í fótbolta EM 2022 í Englandi

Tengdar fréttir

Leik lokið: Belgía-Ís­land 1-1 | Allt jafnt í Manchester

Ísland og Belgía gerðu 1-1 jafntefli er liðin mættust á akademíuvelli Manchester City í D-riðli Evrópumóts kvenna í fótbolta í dag. Ísland komst yfir en klaufaleg vítaspyrna kom Belgíu inn í leikinn og því fór sem fór.

„Þetta dettur með okkur í næsta leik“

„Held að við áttum meira skilið, áttum fullt af góðum færum – dauðafærum – og hefðum getað skorað úr vítinu en svona er þetta bara,“ sagði Sveindís Jane Jónsdóttir í viðtali við RÚV eftir landsleik Íslands og Belgí á EM kvenna í fótbolta.

„Ég þurfti bara að vinna upp fyrir þetta klúður“

Berglind Björg Þorvaldsdóttir skoraði fyrsta mark Íslands á EM 2022 í 1-1 jafntefli liðsins gegn Belgíu í opnunarleik D-riðils. Hún nætti þá upp fyrir vítaspyrnu sem hún lét verja frá sér í fyrri hálfleik og segir það hafa verið mikinn létti.

„Gríðar­lega svekkt að fara úr þessum leik með eitt stig“

„Við vorum klárlega betra liðið og fáum færi til að klára þennan leik. Er eiginlega gríðarlega svekkt að fara úr þessum leik með eitt stig,“ sagði Glódís Perla Viggósdóttir eftir 1-1 jafntefli Íslands og Belgíu fyrr í dag.

Mest lesið


Fleiri fréttir

Sjá meira


×

Mest lesið