Körfubolti

Einn nýliði í hópnum gegn Spáni og Úkraínu

Sindri Sverrisson skrifar
Tryggvi Snær Hlinason er á sínum stað í íslenska hópnum.
Tryggvi Snær Hlinason er á sínum stað í íslenska hópnum. VÍSIR/HULDA MARGRÉT

Craig Pedersen, landsliðsþjálfari karla í körfubolta, hefur valið 12 leikmenn og einn varamann fyrir komandi leiki við Spán og Úkraínu í undankeppni HM.

Einn nýliði er í íslenska hópnum en það er Hilmar Pétursson sem í sumar fór frá Breiðabliki til þýska liðsins Muenster.

Ísland á möguleika á þeim sögulega árangri að komast á HM nú þegar seinna stig undankeppninnar er að hefjast. Liðið tók þangað með sér sigrana tvo gegn Hollandi og sigurinn gegn Ítalíu (og tapið) af fyrra stigi undankeppninnar.

Staðan í riðli Íslands. Tvö stig fást fyrir sigur og eitt fyrir tap. Ísland vann báða leiki sína gegn Hollandi og annan leikinn gegn Ítalíu en tapaði hinum með meiri mun. Nú á liðið eftir alls sex leiki gegn liðunum úr öðrum riðli; Spáni, Úkraínu og Georgíu. Þrjú efstu liðin komast á HM.Skjáskot/Wikipedia

Á seinna stiginu leikur Ísland alls sex leiki, gegn Spáni, Úkraínu og Georgíu. Liðið byrjar á útileik gegn Spáni næsta miðvikudag og á svo heimaleik gegn Úkraínu laugardaginn 27. ágúst í Ólafssal, og er miðasala hafin í gegnum appið Stubbur.

Íslenska liðið er án Martins Hermannssonar sem sleit krossband í hné í vor en hópurinn sem Craig valdi er skipaður eftirtöldum leikmönnum:

Landsliðshópur Íslands:

  • Elvar Már Friðriksson · Rytas Vilnius, Litháen (59)
  • Haukur Helgi Briem Pálsson · Njarðvík (70)
  • Hilmar Pétursson · Muenster, Þýskalandi (Nýliði)
  • Hörður Axel Vilhjálmsson · Keflavík (93)
  • Jón Axel Guðmundsson · Hakro Merlins Crailsheim, Þýskaland (20)
  • Kári Jónsson · Valur (26)
  • Kristófer Acox · Valur (46)
  • Sigtryggur Arnar Björnsson · Tindastóll (22)
  • Styrmir Snær Þrastarson · Davidson, USA (3)
  • Tryggvi Snær Hlinason · Basket Zaragoza, Spáni (52)
  • Þórir G. Þorbjarnarsson · Ovideo, Spáni (18)
  • Ægir Þór Steinarsson · CB Lucentum Alicante, Spáni (74)

13. leikmaður liðsins: Ragnar Ágúst Nathanaelsson · Hamar (57)

Þjálfari: Craig Pedersen

Aðstoðarþjálfari: Hjalti Þór Vilhjálmsson og Baldur Þór Ragnarsson

Sjúkraþjálfari: Valdimar Halldórsson · Atlas Endurhæfing

Læknir: Hallgrímur Kjartansson

Sóttvarnarfulltrúi FIBA: Jón Bender

Fararstjórn og liðsstjórn: Hannes Jónsson og Kristinn Geir Pálsson

Fyrirkomulag keppninnar

Ísland var upprunalega í H-riðli með Rússlandi, Ítalíu og Hollandi og komst áfram í aðra umferð líkt og Ítalía og Holland, en Rússland var dæmt úr leik vegna stríðsins í Úkraínu. Ísland vann tvo leiki gegn Hollandi og einn gegn Ítalíu og tekur með sér stigin sín.

Liðin sem sameinast Íslandi, Ítalíu og Hollandi í nýjum sex liða riðli eru Spánn, Georgía og Úkraína. Þrjú efstu þessara liða eftir aðra umferð, þar sem liðin leika gegn hinum nýju liðum heima og að heiman, leika á HM næsta sumar. 

Alls verða það 12 evrópsk lið sem leika á HM sem fram fer í Japan, Indónesíu og á Filipseyjum.

Körfubolti HM 2023 í körfubolta Landslið karla í körfubolta

Mest lesið


Fleiri fréttir

Sjá meira


×

Mest lesið