Seinni bylgjan: Er ÍBV langbesta liðið í deildinni?

Fjórtán umferðum er nú lokið hjá konunum sem þýðir að tveir þriðju af deildinni er búnir og því aðeins síðasti þriðjungurinn eftir. Liðin hafa öll mæst tvisvar sinnum en eiga eftir að mætast öll einu sinni til viðbótar.

Spennan gæti reyndar ekki verið meiri á toppi deildarinnar því Valur og ÍBV eru jöfn með 24 stig. Valskonur unnu aftur á móti níu fyrstu leiki sína á meðan ÍBV hefur unnið tíu síðustu leiki sína.

Eyjakonur hafa ekki tapað í deildinni síðan að þær töpuðu á móti Val 19. október síðastliðinn.

Það kemur því kannski ekki á óvart að sérfræðingarnir hafi fengið spurninguna um hvort Eyjakonur væru með langbesta liðið þar sem enginn hefur unnið í meira en þrjá mánuði.

Er ÍBV langbesta liðið í deildinni?

„Já ég held að við getum sagt það eins og staðan er akkúrat í dag. Þær eru á toppinum á sinni öldu nákvæmlega núna. Þær eru búnar spila frábærlega í síðustu leikjum. Ég held að ég hafi ekki séð Sigga svona glaðan síðan að ég veit ekki hvenær. Ég held að þær myndu vinna öll lið deildarinnar eins og staðan er núna,“ sagði Árni Stefán Guðjónsson, sérfræðingur Seinni bylgjunnar.

„Já þær eru langbestar. Ég sagði þetta fyrir áramót þannig að fólk viti það. Ég sagði í jólaþættinum að þær myndu rúlla upp deildinni eftir áramót og Sigurður Bragason er að gera það með sínar stelpur,“ sagði Einar Jónsson, sérfræðingur Seinni bylgjunnar.

Sérfræðingarnir fengu líka að svara fleiri spurningum eins og um hvaða lið verður ekki á sama stað og þau eru núna þegar deildarkeppnin klárast og hvaða leikmaður á mest inni fyrir lokakaflann. Það má sjá öll svörin í myndbandinu hér fyrir neðan.