Ó­frískar konur mega nú taka þátt í Ung­frú Ís­land

„Aðalmarkmiðið er að finna konu sem er fyrirmynd og allir geta speglað sig í á einhvern hátt. Við höfum verið bundin við það síðustu sjötíu ár sem þessi keppni hefur verið haldin, að Miss Universe hefur ekki leyft mæður eða giftar konur. Þannig þetta er rosalega stórt skref,“ segir Manuela í samtali við Vísi.

Undankeppni Miss Universe hét áður Miss Universe Iceland og var það Manuela sem fór fyrir þeirri keppni ásamt Pageant Smart. Nú hafa þau hins vegar tekið yfir Ungfrú Ísland vörumerkið og tekur sú keppni við af Miss Universe Iceland.

Skrifar gagnrýni á fáfræði

Manuela segir umhverfi fegurðarsamkeppna vera gjörbreytt frá því að hún var sjálf krýnd Ungfrú Ísland árið 2002. Þá hafi keppendur verið settir á vigt og úlitskröfurnar hafi verið allsráðandi. Það er nú liðin tíð samkvæmt Manuelu.

„Það er ekkert leyndarmál að fegurðarsamkeppnir fá á sig gagnrýni en ég skrifa það alltaf bara á fáfræði. Í dag er þetta svo rosalega breytt. Það er ekkert eftir af þessum gömlu hugmyndum sem voru áður ríkjandi. Keppnin sjálf er kannski eins upp byggð en áherslurnar eru allt allt aðrar. Það er alveg ástæða fyrir því að margar stelpur taka þátt aftur og aftur. Þær fá svo rosalega mikið út úr því að keppa, jafnvel þótt þær vinni ekki,“ segir Manuela.

Leita að einhverri sem er tilbúin að fara „all-in“

Hún segir keppnina í dag snúast að miklu leyti um sjálfsvinnu og að skapa vettvang fyrir konur til þess að nota röddina sína og láta gott af sér leiða. Engar útlitskröfur eru gerðar, heldur eru einu skilyrðin fyrir þátttöku að vera kona á aldrinum 18-28 ára. Þó þarf sigurvegarinn að vera tilbúinn að takast á við það stóra verkefni sem Miss Universe er. Sú sem hreppir annað sætið fer einnig út í stóra keppni, Miss Supranational.

„Það eru margar sem gera sér ekki grein fyrir því hvað það er raunverulega erfitt að fara í svona stóra keppni. Það er brjáluð keyrsla og þetta tekur á bæði andlega og líkamlega. Við náttúrlega reynum að undirbúa okkar keppendur fyrir stóru keppnina eins vel og við getum. Þannig það þarf einhverja sem er tilbúin í að fara „all-in“ í alla þá vinnu sem fylgir.“

Miss Universe er fyrir allar konur

Manuela segir fjölbreytileikann stöðugt vera að aukast í keppninni erlendis. Til að mynda hafi fyrsta trans konan tekið þátt í keppninni árið 2018 fyrir hönd Spánar. Þá hafi konur sem notast við hjólastól einnig tekið þátt í undankeppnunum erlendis.

Hún tekur því þessum nýju breytingum fagnandi, enda eru þær til þess fallnar að auka fjölbreytileikann enn frekar.

„Mér finnst þetta bara frábær leið til að undirstrika að Miss Universe er fyrir allar konur og ég vonast bara til að sjá fjölbreyttan hóp umsækjenda og fá glæsilegar giftar mæður í hópinn í ár,“ segir Manuela sem hvetur allar áhugasamar konur á aldrinum 18-28 ára til þess að sækja um.