Óvissa eitur í beinum fjárfesta

Vonir stóðu til að fréttir af yfirtökunni myndu verða til þess að endurheimta traust innan bankageirans og koma á jafnvægi á fjármálamörkuðum. Þessu var þó ekki fyrir að fara við opnun markaða nú í morgun. Hlutabréf í Credit Suisse tóku dýfu um 60,5 prósent en hlutabréf í UBS hafa þá fallið um 16% sem er mesta lækkun bankans á einum og sama deginum frá bankahruni 2008. Þá hafa hlutabréf í evrópskum bönkum einnig lækkað í dag.

UBS keypti Credit Suisse á 3,24 milljarða Bandaríkjadala sem langt undir því verði sem bankinn var metinn á fyrir helgi eða 8 milljarða Bandaríkjadala. Þessi óróleiki hefur líka haft áhrif á íslensku Kauphöllina sem var að mestu rauðglóandi við opnun markaða. Magnús Harðarson, forstjóri Kauphallar, var spurður hvort hann kynni einhverja skýringu á því í ljósi þess að lending væri nú komin í mál svissneska bankans.

„Ég rek þetta til óvissunnar sem fylgir svona viðburði. Þrátt fyrir að þetta sé ríkistryggð yfirtaka þá er þetta til merkis um að þarna hafi ástandið ekki verið gott. Ég rek þetta fyrst og fremst til óvissu sem felst í því að svona ástand getur haft áhrif á efnahagslífið og þar með til dæmis ákvarðanir Seðlabanka, verðbólgu og ganginn í efnahagslífinu almennt.“

Á miðvikudag verður ný vaxtaákvörðun Seðlabankans kynnt. Innherji á Vísi segir frá því í dag að mikill meirihluti markaðsaðila geri ráð fyrir að Seðlabankinn muni hækka vexti ýmist um 75 eða 100 punkta. Viðskiptamiðillinn leitaði til tuttugu og tveggja greinenda á fjármálamarkaði og flestir voru sammála um að hækkunin verði meiri en 50 punkta.

Er ekki óhætt að segja að óvissa sé óvinur markaðarins?

„Já, almennt séð þá er óvissa eitur í beinum fjárfesta, það er óhætt að segja það,“ segir Magnús.

En það eru ekki bara slæmar fréttir af Kauphöllinni því í dag var þriðja og síðasta skrefið tekið í að færa íslenska hlutabréfamarkaðinn úr vaxtaflokki í nýmarkaðsflokk. Fyrirtækið FTSE Russell metur gæði hlutabréfamarkaða og reiknar vísitölur sem ýmsir sjóðir fjárfesta í samræmi við. Þessi hækkun gæti þýtt innflæði á íslenskan markað upp á 40-50 milljarða.

„Það er bæði gæðastimpill á markaðnum og viðurkenning á því starfi sem hefur fram og það þýðir að erlendir fjárfestar eru viljugir til þess að koma inn á markaðinn.“