Herð­a lög um þung­un­ar­rof í enn einu rík­in­u

Frumvarpið var samþykkt 27-19 í öldungadeildinni í gær en allir fimm kvenkyns öldungadeildarþingmenn Suður-Karólínu höfðu átt í málþófi til að reyna að stöðva framgöngu þess. Af 46 sætum öldungadeildarinnar sitja Repúblikanar í þrjátíu þeirra en þrír þingmenn flokksins, allar konur, greiddu atkvæði gegn frumvarpinu.

Núgildandi lög Suður-Karólínu heimila konum að gangast þungunarrof á fyrstu 22 vikum meðgöngu.

Repúblikanar í Suður-Karólínu höfðu áður samþykkt sambærilegt frumvarp en Hæstiréttur ríkisins sagði það í janúar brjóta gegn stjórnarskrá Suður-Karólínu. Andstæðingar nýja frumvarpsins hafa sagt að látið verði reyna á hvort það standist stjórnarskrá.

Frumvarpið verður sent til Henry McMaster, ríkisstjórans, sem segist ætla að skrifa undir það en hann er einnig Repúblikani. Samkvæmt því mega konur gangast þungunarrof innan tólf vikna í tilfellum nauðgunar og/eða sifjaspells. Þar eru einnig undanþágur sem snúa að heilsu kvenna og fóstra.

Þá standa læknar sem brjóta lögin frammi fyrir sektum og allt að tveggja ára fangelsisvist, samkvæmt frétt Washington Post.

Greiða meðlag frá getnaði en ekki fæðingu

Verði frumvarpið að lögum munu stúlkur undir sextán ára aldri sem sækjast eftir þungunarrofi án leyfis þurfa leyfis dómara, nema í tilfellum nauðgana og/eða sifjaspells. Andstæðingar frumvarpsins sögðu það langt frá því vera nægan tíma en stuðningsmenn þess segja að þar sem stúlkur undir sextán ára aldri geti ekki veitt samþykki fyrir kynmökum, samkvæmt lögum, heyri slík tilfelli undir nauðgunarákvæði frumvarpsins. Því hafi þær tólf vikur.

Frumvarpið segir einnig að feður eigi að greiða meðlag frá getnaði en ekki fæðingu.

Washington Post segir að þingmaðurinn Tom Davis hafi að spilað stóra rullu í samþykkt frumvarpsins. Hann hafði áður verið gegn því en snerist hugur og greiddi atkvæði með því að stöðva málþóf áðurnefndra kvenna og svo með frumvarpinu sjálfu.

Í samtali við Washington Post fyrir atkvæðagreiðsluna í gær sagði Davis að málið snerist um að finna jafnvægi réttinda.

„Á einhverjum tímapunkti verður réttur ríkisins á því að ófætt barnið fæðist æðri rétti konunnar yfir líkama hennar,“ sagði Davis.

Herða lögin víðsvegar um Bandaríkin

Frá því Hæstiréttur Bandaríkjanna felldi stjórnarskrárvarinn rétt kvenna til þungunarrofs úr gildi í fyrra hafa Repúblikanar víðsvegar um Bandaríkin hert lög um þungunarrof mjög. Þetta á sérstaklega við ríki í sunnanverðum Bandaríkjunum, þar sem Repúblikanar fara með stjórnartaumana.

Sjá einnig: Skaut kærustu sína til bana eftir að hún fór í þungunar­rof

Suður-Karólína hefur verið vin í eyðimörk þegar kemur að þungunarrofi og hafa konur ferðast þangað frá öðrum suðurríkjum til að gangast þungunarrof. Slíkum aðgerðum hefur fjölgað töluvert samhliða hertum lögum í nærliggjandi ríkjum.

Nágrannar Suður-Karólínu í norðri hertu nýverið eigin lög en þar hefur þungunarrof verið bannað í flestum tilfellum eftir tólf vikna meðgöngu.

Sjá einnig: Hertu lög um þungunarrof með auknum meirihluta

Alls er búið að herða lög um þungunarrof, eða verið að herða þau, í minnst 25 ríkjum Bandaríkjanna, samkvæmt samantekt New York Times.

Stendur frammi fyrir tveggja ára fangelsi

Umræðan um þungunarrof vestanhafs hefur orðið sífellt harðskeyttari á undanförnum mánuðum. 

73 ára maður var í gær ákærður í Illinois fyrir að hafa keyrt bíl sínum inn í húsnæði þar sem þungunarrof fór fram og reynt að kveikja í húsinu. Skömmu áður höfðu bæjaryfirvöld í Danville, þar sem læknastofan er, samþykkt að banna flutning þungunarrofslyfja til bæjarins, jafnvel þó ráðamenn á ríkisstiginu hafi varað við því að slíkar reglur brytu gegn lögum ríkisins, sem tryggja aðgang kvenna að þungunarrofi.

Þá játaði kona frá Nebraska á mánudaginn að hafa brennt og grafið fóstur eftir að hún tók lyf til að binda enda á meðgöngu hennar. Hún er átján ára gömul en þegar hún var sautján og komin 29 og hálfa viku á leið, tók hún áðurnefnd lyf. Hún var ákærð sem fullvaxta einstaklingur og stendur frammi fyrir tveggja ára fangelsisvist.

Saksóknarar hafa einnig ákært móður hennar fyrir að hjálpa henni en þær höfðu talað um lyfið á Facebook, samkvæmt AP fréttaveitunni.

Ríkisstjóri Nebraska skrifaði á mánudaginn undir frumvarp sem snýst um bann við þungunarrofi eftir tólf vikna meðgöngu. Áður var þungunarrof bannað eftir tuttugu vikur.