Lukas tekur við af Agli sem hættir eftir 27 ára starf hjá Össuri

Í tilkynningu frá Össuri segir að Lukas Märklin hafi verið ráðinn framkvæmdastjóri rekstrarsviðs og muni hann hefja störf síðar á árinu. 

„Lukas kemur til Össurar frá Straumann, leiðandi fyrirtæki á heimsvísu á sviði lækningatækja, þar sem hann hefur verið leiðtogi í yfir tvo áratugi, nú síðast sem yfirmaður rekstrarsviðs. Hann er vélaverkfræðingur að mennt með meistaragráðu frá ETHZ Swiss Federal Institute of Technology,“ segir í tilkynningunni.

Haft er eftir Sveini Sölvasyni, forstjóra Össurar, að Egill Jónsson hafi verið mikilvægur leiðtogi innan Össurar síðastliðin 27 ár. „Hann hefur tekið þátt í örum vexti félagsins og leitt umbreytingar á framleiðslu, gæða- og aðfangastýringu Össurar á heimsvísu. Össur framleiðir þúsundir vara í sex löndum og dreifimiðstöðvar á lykilmörkuðum sjá um vörudreifingu til yfir 100 landa. Fyrir hönd Össurar vil ég þakka Agli kærlega fyrir hans mikilvæga framlag og óska honum alls hins besta í framtíðinni.“

Þá segir Sveinn að Lukas Märklin komi nýr inn í framkvæmdastjórn félagsins sem reyndur leiðtogi á sviði framleiðslu á lækningatækjum. „Lukas mun styðja við frekari vöxt og verðmætasköpun Össurar og við hlökkum til að bjóða hann velkominn síðar á árinu,” segir Sveinn.