Lýtalæknir selur glæsihöll á Arnarnesi

Húsið er á tveimur hæðum með auka íbúð og þrjátíu fermetra bílskúr.

Á fasteignavef Vísis kemur fram að eignin skiptist í fimm svefnberbergi, fjögur baðherbergi, eldhús, sjónvarpshol og þrjár stofur. 

Á efri hæð hússins er opið og bjart alrými með gluggum sem snúa í norður og suður með útsýni út á sjó. Eldhúsið er veglegt og sérhannað með hvítum innréttingum og stórri eyju. 

Borðstofan liggur þvert á eldhúsið samhliða gólfsíðum gluggum þar sem útgengt er á glæsilega verönd og vel hirtan garð í suður mót sól. 

Áætlað fasteignamat fyrir eignina á næsta ári eru tæpar 164 milljónir.

Ágúst er sjálfstætt starfandi sérfræðingur í lýtalækningum við Læknastofur Akureyrar og í Læknahúsinu í Dómus Medica, Reykjavík. Auk þess opnaði hann einkaklíníkina Læknastofur Reykjavíkur í Efstaleiti í byrjun árs.