Ætla ekki að leyfa útflutning korns lengur

Í júlí á síðasta ári undirrituðu fulltrúar Úkraínu, Rússlands, Tyrklands og Sameinuðu þjóðanna samning sem greiddi fyrir útflutningi þessum. Samkvæmt samkomulaginu áttu Rússar einnig að geta flutt matvæli og áburð úr landi.

Samningurinn hefur verið gífurlega mikilvægur fyrir fæðuöryggi en sérfræðingar sem AP fréttaveitan ræddi við segja að riftun samkomulagsins muni ekki hafa mikil áhrif á matvælaverð á heimsvísu.

Sérfræðingarnir segja þó að fæðuóöryggi sé að færast í aukana í heiminum. Sameinuðu þjóðirnar segja 45 ríki heims þurfa aðstoð vegna matarskorts og hungurs.

Fréttaveitan RIA, sem er í eigur rússneska ríkisins, hefur eftir Dmitrí Peskóv, talsmanni Pútíns, að utanríkisráðuneytið hafi tilkynnti Tyrkjum, Úkraínumönnum og Sameinuðu þjóðunum að samkomulagið verði ekki framlengt.

Rússar halda því fram að Úkraínumenn hafi ekki verið að flytja korn til Afríku og ríkja sem þurfa á því að halda og þar að auki hafi ekki verið nægjanlega greidd leið fyrir sölu þeirra á matvælum og áburði.

Í frétt BBC er vísað í tölur frá Sameinuðu þjóðunum um að 47 prósent korns frá Úkraínu sem flutt hafi verið úr landi með samkomulaginu, hafi verið flutt til hátekjuríkja eins og Spánar, Ítalíu og Hollands. Þá eru 26 prósent sögð hafa farið til millitekjuríkja eins og Tyrklands og Kína og 27 prósent til lágtekjuríkja eins og Egyptalands, Kenía og Súdan.

Í fyrra kom meiri en helmingur hveitkorns Matvælaáætlunar Sameinuðu þjóðanna frá Úkraínu.

Sjá einnig: Guter­res segir samninginn það mikil­vægasta sem hann hafi gert hjá SÞ

Þá hafa yfirvöld í Úkraínu sakað Rússa um að skemma samkomulagið með því að koma í veg fyrir að fleiri skip geti flutt korn en 29 skip voru til taks en áhafnir þeirra fengu ekki leyfi. Þá segja Úkraínumenn að hægagangur með skoðanir um borð í skipunum, sem tryggja átti að þau væru ekki notuð til að flytja vopn, hafi komið verulega niður á útflutningi.

Þegar mest var, í október, voru ellefu skip skoðuð á hverjum degi. Í júní voru um 2,3 skip að meðaltali skoðuð á dag. Úkraínumenn og Bandaríkjamenn hafa kennt Rússum um þennan hægagang.

Á sama tíma hafa Rússar flutt metmagn af hveiti til annarra ríkja. Sérfræðingar segja útlit fyrir að hveitiútflutningur Rússa verði meiri á þessu ári en hann hefur nokkru sinni verið áður. Ekkert ríki hafi flutt svo mikið magn út á ári áður.

Rússar hafa einnig brugðist reiðir við drónárásum Úkraínumanna á rússnesk herskipá Svartahafi og hafa sagt það brjóta gegn kornsamkomulaginu.

Þetta er ekki í fyrsta sinn sem Rússar segjast ætla að stöðva útflutning Úkraínumanna.