Meirihluti landsmanna telur of marga flóttamenn fá hæli

Sex af hverjum tíu landsmönnum telja of margt flóttafólk fá hæli hér á landi. Þetta er algjör viðsnúningur á viðhorfi til flóttafólks en frá árinu 2017  hefur um og yfir fjórðungur haft þessa skoðun. Þriðjungur þegar mest var árið 2020.

Þetta kemur fram Maskínukönnun sem gerð var um mánaðamótin. Alls tóku um þúsund manns þátt í könnuninni.

Katrín Jakobsdóttir forsætisráðherra telur mikinn fjölda aðfluttra á stuttum tíma geta skýrt þessa kúvendingu.

„Þessi mál hafa verið mikið í umræðunni sem hefur að sjálfsögðu áhrif. Að sjálfsögðu hafa fleiri verið að koma til landsins vegna stríðsins í Úkraínu og vegna ýmissa aðstæðna í heiminum sem hefur gert það að verkum að fleira fólk er á flótta. Þá getur spilað inn í að hér eru fleiri sem koma til að vinna en áður.  Við erum að sjá meiri fjölda fólks af erlendum uppruna í samfélaginu en nokkurn tíma áður. Það auðvitað skapar ný viðfangsefni gagnvart því  hvernig við tryggjum hér gott samfélag fyrir okkur öll,“ segir Katrín.

Hún segir mikilvægt að vanda alla umræðu um málefni flóttamanna. 

„Þetta er viðkvæmur málaflokkur og það skiptir miklu máli hvernig við ræðum þessi mál,“ segir Katrín. 

Færri sem telja flóttamenn of fáa

Viðhorfsbreytingin sem kemur fram í könnun Maskínu endurspeglast einnig í fjölda þeirra sem telur flóttamenn of fáa hér á landi. Þetta hlutfall er 17 prósent nú en síðustu ár hefur um og yfir þriðjungur landsmanna verið á þessari skoðun.

Fleiri karlar en konur telja að flóttamenn séu orðnir of margir á landinu eða um 65 prósent karla á móti 55 prósentum kvenna.

Eldri kynslóðir eru mun neikvæðari í garð flóttamanna en þær yngri en um tveir þriðju hlutar fimmtíu ára og eldri telur flóttamenn of marga.

Þá eru íbúar á Suðurlandi og Reykjanesi lang neikvæðastir í garð flóttamanna en þar telja næstum áttatíu prósent þá of marga samkvæmt könnunni.

Næstum allir kjósendur Miðflokksins telja flóttamenn of marga, Átta af hverjum tíu Sjálfstæðismönnum, 76 prósent kjósenda flokks fólksins og sjö af hverjum tíu kjósendum Framsóknarflokksins. 

Kjósendur annarra flokka eru mun jákvæðari í garð fjölda flóttamanna hér á landi. Ríflega helmingur kjósenda Pírata telur  of fáa flóttamenn á landinu, fjórir af hverjum tíu kjósendum Sósíalista flokksins er sama sinnis. Einn af hverjum fimm kjósendum Vinstri grænna og tæplega þriðjungur kjósenda Samfylkingar.Almennt hafa viðhorfin gagnvart flóttamönnum hins vegar dalað í öllum flokkum. 

Viðvörunarbjöllur hafi hringt lengi

Bjarni Benediktsson fjármálaráðherra og formaður Sjálfstæðisflokksins  segir niðurstöðurnar ekki koma á óvart.

„Viðvörunarbjöllur hafa hringt lengi, við höfum haft gríðarlegan fjölda umsækjenda og þetta hefur kallað á ýmsar  félagslegar áskoranir og áskoranir gagnvart innviðum í landinu. Þá er kostnaðurinn í þessum málaflokk auðvitað farinn úr öllum böndum,“ segir Bjarni.

Hann segir mikilvægt að hafa skýra sýn í málaflokknum. 

„Aðalatriðið í mínum huga er að við gerum okkar hlut í alþjóðlega hælisleitendakerfinu. Við eigum ekki að hafa  séríslenskar reglur sem kalla á aukinn þrýsting hér umfram skilvirkni. Þá þurfum við að auka skilvirkni í kerfinu. Við þurfum að komast miklu hraðar að niðurstöðu í þessum málum en nú er,“ segir Bjarni Benediktsson.