Borg­ar ekki fjöl­skyld­un­um sem hann hrellt­i en spreð­ar pen­ing­um

Þann 19. september árið 2012 voru tuttugu börn á aldrinum fimm til tíu ára skotin til bana í Sandy Hook auk sex starfsmanna skólans.

Jones rekur miðilinn InfoWars þar sem hann er ekki síst þekktur fyrir vanstillt reiðiöskur í þáttum sínum. Þar hefur hann meðal annars sakað Barack Obama, fyrrverandi Bandaríkjaforseta, um að hafa gert froska samkynhneigða.

Í gegnum árin hefur hann ítrekað haldið því fram að börnin sem myrt voru í árásinni hafi ekki verið raunveruleg og að foreldrar þeirra séu leikarar. Áhorfendur hans hafa áreitt foreldrana og ógnað þeim.

Eftir langvarandi málaferli foreldranna gegn Jones komust dómarar í fyrra að þeirri niðurstöðu að hann ætti að greiða þeim um 1,4 milljarða dala. Það samsvarar rúmlega 191 milljarði króna. Jones sagðist ekki vera borgunarmaður fyrir þessum miskabótum.

Fjölskyldunum hefur gengið erfiðlega að fá peningana. Hann sótti um gjaldþrotaskipti og á meðan dómstólar ákveða hve mikið hann getur greitt fjölskyldunum og öðrum sem hann skuldar, hafa málaferli fjölskyldnanna verið sett í biðstöðu.

Jones heldur þrátt fyrir það áfram að lifa dýrum lífsstíl.

Eyddi hátt í milljón á veitingahúsum

Í frétt AP fréttaveitunnar segir að Jones hafi verið að greiða fyrrverandi eiginkonu sinni fimmtán þúsund dali á mánuði að undanförnu. Lögmenn fjölskyldnanna saka hann um að reyna að koma peningum sínum í skjól en hann segist þurfa að greiða henni vegna samkomulags í tengslum við skilnað þeirra.

Í júlí varði hann þar að auki 7,900 dölum, eða rúmri milljón króna, í húshjálp. Þá eyddi hann 6.300 dölum (862 þúsund krónur) á veitingastöðum og í skemmtun. Hann eyddi einnig um 3.400 dölum (465 þúsund krónur) í matvöruverslunum.

Hann rekur annað heimili við strendur stöðuvatns í Texas sem kostar hann um 6.700 dali á mánuði (916 þúsund krónur) og bílar hans og bátar kosta þar að auk um 5.600 dali á mánuði (766 þúsund krónur).

Í heildina eyddi hann 93 þúsund dölum í júlí, eins og áður hefur komið fram, og er það samkvæmt dómskjölum vegna málaferla sem tengjast gjaldþrotaferli hans. Í apríl eyddi hann 75 þúsund dölum.

Einn lögmanna fjölskyldnanna segir ólíðandi að Jones verji þessum peningum í lúxuslífstíl sinn, því fjölskyldurnar sem hann kvaldi um árabil eigi þennan pening í rauninni. Lögmaðurinn segir að fjölskyldurnar muni halda áfram að berjast fyrir sínu.

Þeim hefur gengið illa að ná utan um fjármál Jones, vegna margra félaga sem hann á og fjölmargra samninga sem hann hefur gert á milli þeirra.

Vill þrefalda launin sín

Jones sjálfur sagði í þætti sínum á þriðjudaginn að hann væri ekki að gera neitt af sér. Honum þætti gott að fara á góð veitingahús og í góð frí nokkrum sinnum á ári.

„Ég held ég hafi unnið mér það inn eftir þessa baráttu,“ sagði Jones skömmu áður en hann hvatti áhorfendur sína til að styðja sig fjárhagslega vegna lögfræðiskostnaðar hans.

Jones hefur farið fram á það við dómstóla að honum verði leyft að gera nýjan samning milli síns og eigin fjölmiðlafélags sem heitir Free Speech Systems. Sá samningur hljómar upp á eina og hálfa milljón dala í laun á ári, auk bónusgreiðslna.

Hann er núna með 520 þúsund dali í laun á ári.

Samkvæmt AP segja lögmenn Jones að hann eigi um fjórtán milljónir dala í eigur. Þar á meðal er búgarður hans og áðurnefnt aukaheimili auk einnar íbúðar sem hann hefur leigt út. Hann á einnig fjóra bíla og tvo báta, samkvæmt áðurnefndum skjölum, og átti tæplega átta hundrað þúsund dali á bók í lok júlí.

Í þætti sínum á Info Wars selur Jones fæðubótarefni, neyðarbirgðir fyrir fólk ef heimurinn skildi enda og aðrar vörur. Tekjur Free Speech Systems af þessari sölu eru miklar. Sölutekjur fyrirtækisins voru nærri því tvær og hálf milljón dala í júlí. Í sömu skjölum hélt Jones því fram að útgjöld fyrirtækisins væru 2,4 milljónir.