Dánarorsök leikmanns enn óþekkt

Cusack var 27 ára þegar hún lést að heimili sínu í Horsley í Derbyskíri á Englandi þann 20. september. Hún var leikmaður Sheffield United og enginn í því liði hafði spilað með því eins lengi þegar hún lést.

Lögreglan í Derbyskíri segir frá því að ekki sé talið að andlát hennar hafi borið að með saknæmum hætti.

Réttarrannsókn á dauða Cusack er ekki lokið en málið var tekið fyrir í gær af dánardómsstjóra.

„Við bíðum eftir lögregluskrá og læknisfræðilegri dánarorsök,“ hefur breska ríkisútvarpið, BBC, eftir Louise Pinder, aðstoðarlíkskoðara. „Vegna þessa fresta ég rannsókninni í sex vikur til frekari skoðunar.“

Cusack varð í fyrra fyrsti leikmaður í sögu kvennaliðs Sheffield United til að spila 100 leiki fyrir félagið. Hún kom til Sheffield frá Leicester City árið 2019. Hún starfaði samhliða því hjá markaðsdeild félagsins.

Bæði kvenna- og karlalið liðsins heiðruðu minningu hennar á leikjum þeirra eftir að hún lést.

Andlát hennar var harmþrungið fyrir alla á Bramall Lane, er haft eftir framkvæmdastjóra félagsins, Stephen Bettis.