Blikk brýtur blað með grænu ljósi Seðla­bankans

Í tilkynningu frá Blikk segir að fjármálaeftirlit Seðlabanka Íslands hafi nýverið veitt fjártæknifyrirtækinu starfsleyfi á grundvelli laga um greiðsluþjónustu frá árinu 2021. Megintilgangur með lögunum, sem byggir á Evróputilskipun, er að gera greiðslumiðlun skilvirkari, hagkvæmari og öruggari auk þess að skapa samkeppnisgrundvöll fyrir greiðsluþjónustuveitendur og ýta þannig undir nýsköpun á sviði greiðslumiðlunar.

Leyfið gerir Blikk kleift að vera annars vegar milligönguaðili um greiðslur milli aðila, svokallaður greiðsluvirkjandi og hins vegar veitir leyfið Blikk aðgang að reikningsupplýsingum einstaklinga og fyrirtækja til þriðja aðila sem geta þróað virðisaukandi þjónustur byggða á þessum gögnum. Um bæði tilvikin, þ.e. greiðsluvirkjun og reikningsupplýsingaþjónustu, gilda strangar kröfur um upplýst samþykki og sannvottun þess sem gögnin varða, þ.e. þá einstaklinga og fyrirtækin sem gögnin tilheyra.

Greiðsla af einum reikningi yfir á annan

„Blikk hefur í tæp tvö ár þróað smágreiðslulausn þar sem greiðsla færist beint af bankareikningi kaupanda yfir á bankareikning seljanda án aðkomu hefðbundinna greiðslukortafyrirtækja. Mikil umræða hefur verið í samfélaginu um kostnað og ógagnsæi vegna greiðsluþjónustu á Íslandi enda er kostnaðurinn allt að þrefaldur því sem þekkist erlendis frá.,“ segir í tilkynningunni.

Með Blikk greiðsluþjónustu sé kominn valkostur sem geti orðið veruleg búbót fyrir samfélagið í heild þar sem byggt sé á skilvirkari og hagkvæmari tæknilausn en þeirri sem upphaflega var búin til við gjörólíkar aðstæður á miðri síðustu öld. Greiðsluþjónusta Blikk sé ekki einungis hagkvæmari kostur en þeir sem nú eru notaðir heldur bjóði tæknin einnig upp á nýja möguleika til hagsbóta fyrir neytendur og söluaðila.

Bjarni Gaukur Sigurðsson, framkvæmdastjóri Blikk, segir að á undanförnum árum og áratugum hafi orðið miklar breytingar á neytendavenjum hvað varðar hvernig greitt er fyrir vörur og þjónustu. 

„Þessar breytingar hafa haft í för með sér mikla hagsbót fyrir samfélagið og í dag er það svo að nánast öll velta á smávörumarkaði er í gegnum greiðslulausnir sem eru á einn eða annan hátt byggðar ofan á kerfi kortafyrirtækja eins og MasterCard og VISA,“ segir Bjarni Gaukur.

Möguleikar opnast árið 2021

„Gallinn við núverandi kerfi er sá að milliliðirnir eru ansi margir og fer fjölgandi fremur en fækkandi með tilheyrandi kostnaði. Það skýtur skökku við að þegar maður er í verslun og borgar með síma eða korti þá fer greiðslan á mikið ferðalag með fjölmörgum stoppistöðvum, jafnvel út fyrir landsteinana, og tilheyrandi kostnaði þar til hún skilar sér loks inn á reikning söluaðilans.“

Með tilkomu tækninýjunga og þeirra breytinga sem innleiddar voru í lög árið 2021 hafi opnast möguleikar til þess að gera greiðslulausnir sem eru tengdar beint við bankareikninga fremur en kort. Á því byggi nýja greiðslulausnin. 

„Við köllum það einfaldlega að blikka. Blikk greiðslur fara beint á milli aðila, eru ódýrari en kortagreiðslur og berast söluaðila í rauntíma eins og ætti að þykja eðlilegt í nútímasamfélagi. Allt sem heitir uppgjör heyrir því sögunni til. Neytendur geta fengið vörukvittunina í Blikk appið og ég sé fyrir mér að þetta geti hjálpað þeim að halda utan um neyslu sína sem og þróun vöruverðs. Þetta gerir söluaðilum kleift að þjónusta viðskiptavini sína á persónulegri hátt en áður hefur þekkst, t.d. til sníða tilboð að hverjum og einum, virkja afslætti vildarklúbba sjálfkrafa og svo mætti lengi telja.“

Greiðsla með einu blikki

Umræða um þjóðaröryggi tengt greiðslumiðlun hafi farið hátt í samfélaginu upp á síðkastið en með tilkomu Blikk sé komin greiðslulausn sem sé í senn óháð og innlend. 

„Tæknileg högun Blikk er þannig háttað að hægt er að tryggja að innlend greiðslulausn geti ávallt verið virk jafnvel þó nettenging við útlönd rofni eða vegna annarra erlendra áhrifa. Við erum ákaflega stolt að vera fyrsta fyrirtækið á Íslandi sem fær þetta tiltekna starfsleyfi frá FME og hlökkum til að kynna lausnir okkar á komandi vikum og mánuðum. Markmið okkar er að á Íslandi geti neytendur greitt fyrir viðskipti sín með einu blikki áður en langt um líður.“

Blikk hugbúnaðarþjónusta hf. er að öllu leyti í eigu InfoCapital ehf. og starfsmanna félagsins. InfoCapital er fjárfestingarfélag stofnað árið 2009 af Reyni Grétarssyni, stofnanda Creditinfo Group, og stærsta einstaka hluthafa í Sýn hf.

Vísir er í eigu Sýnar.