Stefán Rafn kynnir Janus Daða til leiks hjá Pick Szeged

Í gær var greint frá því að Janus Daði, sem leikið hefur frábærlega með Magdeburg á tímabilinu, væri á leið til Pick Szeged næsta sumar. Janus Daði gekk nokkuð óvænt til liðs við Magdeburg í sumar eftir fjárhagsvandræði norska stórliðsins Kolstad. Hann mun því aðeins leika eitt tímabil í Þýskalandi.

Í dag staðfestir Pick Szeged síðan komu Janusar Daða. Í myndbandi sem félagið birti er Janus Daði kynntur til leiks af Stefáni Rafni Sigurmannssyni sem lék með Pick Szeged á árunum 2017-2021. Stefán Rafn leikur nú með Haukum.

„Halló handboltafjölskylda, ég verð með ykkur á næsta tímabili,“ segir Janus Daði síðan sjálfur en hann skrifar undir tveggja ára samning við félagið.