Snorri sakaður um að vera kyn­slóða­villingur

Sérkennileg deila, ef deilu skal kalla, er risin milli þeirra Gunnars Smára Egilssonar, eins leiðtoga Sósíalistaflokksins og Snorra. 

Bestur með kálbögglum og sætsúpu

Gunnar Smári ritaði nöturlega færslu á Facebook-vef Sósíalistaflokks Íslands þar sem hann hæðist að honum.

„Snorri Másson er sem gamall karl sem fæddist í ungum líkama. Hann er bráðum 27 ára en talar og hugsar eins og hann sé bæði sjötugur og önugur. Ég átta mig alveg á því hvort Snorri sé að leika þessa týpu eða hvort hann sé nokkurskonar kynslóðavillingur,” skrifar Gunnar Smári. 

Og hann heldur áfram af miklu miskunnarleysi:

„Ég hef heyrt hann halda því fram að afturhald sé hin nýja róttækni, svo það má vel vera að hann trúi að twenties séu hið nýja seventies. Að hlusta á mónólóga á vef hans ritstjori.is er eins og hádegisverður á Múlakaffi, gamlakarlstuð sem er best með kálbögglum og sætsúpu með tvíbökum. “

„Munum að þú ert gamli kallinn!“

Og Gunnar Smári spyr hvort þetta sé virkilega rödd ungu kynslóðarinnar: „Eru ungir íslenskir karlar í dag eins og snýttir út úr nösinni á Kjartani Gunnarssyni?”

Snorri getur vitaskuld ekki látið þessu ósvarað og hann hóf daglega reisu sína yfir það sem hann kallar „Fréttir vikunnar“ á því að svara Gunnari Smára. Og það áður en hann hóf að mæra styrktaraðila sína:

„Við fögnum málefnalegri gagnrýni en ég verð hugsi þegar menn vísa bara í ártöl. Svona er nútíminn, þetta er gamaldags. Af hverju ræðum við ekki hugmyndirnar? Nei, þær eru gamaldags. Þetta er hætta hinnar blindu framfaratrúar. Að ganga út frá því að allt gangi til betri vegar, höfum við gengið götuna til góðs? Þetta var spurning Jónasar,“ segir Snorri.

Snorri er helst á því að Gunnar Smára gerist hér sekur um öldrunarfordóma og segir: „Munum að þú ert gamli kallinn!“

Snorri á reyndar í vök að verjast víðar en aldur hans virðist vefjast fyrir fólki. Meðan Sósíalistaforinginn telur hann fornan í lund sakar Bjarni Benediktsson, formaður Sjálfstæðisflokksins, Snorra um barnaskap á X, áður Twitter.