Munu skoða að losna strax við TM

Þetta segir í bréfi Bankasýslunnar til Sigurðar Inga Jóhannssonar, fjármála- og efnahagsráðherra. Bankasýslan birti í dag viðbrögð sín við greinargerð Landsbankans hf. um kaup á öllu hlutafé í TM tryggingum hf.. Það helsta sem kom þar fram er að öllu bankaráði Landsbankans verður skipt út á aðalfundi þann 19. apríl næstkomandi.

Gætu litið til sölu eða skráningar TM

Í bréfi til ráðherra segir að að aðalfundi loknum muni Bankasýslan óska eftir fundi með nýju bankaráði. Á þeim fundi hyggist stofnunin leggja áherslu á að bankaráðið meti viðskiptin með aðstoð utanaðkomandi sérfræðinga og meta þá valkosti sem bankinn hefur í stöðunni með hliðsjón af ákvæðum laga og eigandastefnu ríkisins. 

Jafnframt muni Bankasýsla ríkisins ítreka mikilvægi þess að bankaráðið fari eftir ákvæðum eigandastefnu ríkisins og samningi bankans við stofnunina. Bankasýsla ríkisins telji að bankaráð Landsbankans gæti til dæmis litið til sölu á TM til þriðja aðila, frumútboðs á hlutum í félaginu, útgreiðslu hluta til eigenda eða endurskipulagningar starfsþátta innan samsteypu bankans og TM.

Bankasýsla ríkisins lýsir sig reiðubúna til að funda með ráðherra til að ræða nánar skýrslu stofnunarinnar og annað sem málið varðar.

Þórdís Kolbrún vildi losa um eignarhaldið sem allra fyrst

Í bréfi þáverandi fjármálaráðherra dagsettu þann 5. apríl síðastliðinn sagði að ráðherra væri sammála stjórn Bankasýslunnar um að tilefni sé til að endurskipa allt bankaráð Landsbankans. Jafnframt telji ráðherra framkomnar upplýsingar gefa Bankasýslunni, fyrir hönd eiganda 98 prósent hlutafjár í bankanum tilefni til skoðunar á því með hvaða hætti sé unnt að losa um fyrirséð eignarhald bankans á tryggingafélaginu eins fljótt og kostur er.

Fram hafi komið að tilboð bankans hafi verið án fyrirvara af hans hálfu. Af því verði ráðið að það kunni að vera erfiðleikum háð að viðskiptin verði látin ganga til baka eða þeim rift af kaupanda. Ekki hafi þó verið endanlega úr því skorið.