Semja um markaðs­setningu verðmæts augnlyfs

Í fréttatilkynningu frá Alvotech segir að Eylea sé líftæknilyf sem notað er til meðferðar við augnsjúkdómum sem geta leitt til sjóntaps eða blindu, svo sem votri augnbotnahrörnun, sjóndepilsbjúgi og sjónukvilla af völdum sykursýki. Á árinu 2023 hafi tekjur af sölu Eylea í Evrópu numið um 2,9 milljörðum Bandaríkjadala, 407 milljörðum króna, samkvæmt upplýsingum frá gagnaveitunni IQVIA.

Alvotech þrói nú AVT06, sem sé fyrirhuguð hliðstæða við Eylea í lágum skammti (2 mg) og AVT29 sem sé fyrirhuguð hliðstæða við Eylea í háum skammti (8 mg).

Fá fyrirframgreiðslu

Samkvæmt samkomulaginu muni Alvotech bera ábyrgð á þróun og framleiðslu á AVT06 og AVT29, en Advanz Pharma verði ábyrgt fyrir því að tryggja markaðsleyfi og sjá um sölu og markaðssetningu. Advanz Pharma fari með einkarétt til sölu í Evrópu, að frátöldu Þýskalandi og Frakklandi þar sem félagið fari með sameiginlegan rétt. Samningurinn feli í sér fyrirframgreiðslu til Alvotech og áfangagreiðslur sem tengdar séu árangri í þróun og sölu lyfjanna.

„Við metum mikils vaxandi samstarf okkar við Advanz Pharma, sem hófst snemma á síðasta ári og hefur nú verið útvíkkað og nær alls til sjö fyrirhugaðra líftæknilyfjahliðstæða. Við eigum það sameiginlegt að hafa óbilandi trú á vexti markaðarins fyrir líftæknilyfjahliðstæður og að leggja þunga áherslu á að auka aðgengi sjúklinga að hagkvæmari líftæknilyfjum,“ er haft eftir Anil Okay, framkvæmdastjóra viðskipta hjá Alvotech.

Ekki fyrsti samningurinn

 „Við erum spennt að treysta enn sambandið við Alvotech með þessari mikilvægu viðbót. Samstarf félaganna dregur fram einstaka styrkleika hvors aðila fyrir sig og undirstrikar að Advanz Pharma er kjörinn samstarfsaðili til markaðssetningar lyfseðilsskyldra lyfja í Evrópu,“ er haft eftir Susanna El-Armale, framkvæmdastjóra viðskiptaþróunarsviðs Advanz Pharma.

Í janúar síðastliðnum hafi Alvotech kynnt jákvæðar niðurstöður rannsóknar sem sýndu sambærilega klíníska virkni, öryggi og ónæmingarverkun AVT06 og samanburðarlyfsins Eylea, í sjúklingum með aldurstengda vota augnbotnahrörnun (AMD). Aðalendapunktur rannsóknarinnar hafi verið uppfylltur.

Í febrúar 2023 hafi Alvotech og Advanz Pharma tilkynnt að félögin hefðu gert samning um markaðssetningu AVT23, fyrirhugaðrar líftæknilyfjahliðstæðu við Xolair (omalizumab). Samningurinn nái yfir Evrópska efnahagssvæðið, Bretland, Sviss, Kanada, Ástralíu og Nýja Sjáland. Í maí 2023 hafi félögin svo tilkynnt að samstarf þeirra hefði verið útvíkkað og næði einnig til fyrirhugaðra hliðstæða við Simponi (golimumab) og Entyvio (vedolizumab), auk þriggja ónefndra fyrirhugaðra hliðstæða á fyrri stigum þróunar.