Geð­læknar ó­sam­mála um á­stand Dag­bjartar

Haraldur Erlendsson geðlæknir tók að sér að meta geðrænt ástand Dagbjartar árið 2021 eftir að æskuvinur hennar biðlaði til hans að taka hana að sér. Haraldur hitti hana sjö sinnum yfir árið og segir hana hafa verið óviðræðuhæfa, með ADHD á hæsta stigi og að minnsta kosti með væga greindarskerðingu. Þetta segir hann í skýrslutöku fyrir Héraðsdómi Reykjavíkur í dag.

Grét bara vegna hundsins

Tómas Zoëga geðlæknir gerði geðmat á Dagbjörtu eftir að hún var færð í hald lögreglu í september. Að mati Tómasar var Dagbjört róleg og viðræðugóð og sýndi ekki merki um greindarskerðingu. Dagbjört hafi sýnt einkenni áfallastreituröskunar en hún hafði áður verið í tveimur mjög erfiðum samböndum og misst íbúð sem henni þótti mjög vænt um fyrir nokkrum árum.

Hundur Dagbjartar drapst tveimur dögum áður en maðurinn lést í Bátavogi. Hún sakaði manninn ítrekað um að hafa eitrað fyrir hundinum. Tómas tók fram fyrir héraðsdómi að hún hafi aldrei misst stjórn á sér í viðtölum fyrr en að minnst var á hundinn. Hann segir mögulegt að dauði hundsins hafi sett hana út af kortinu.

„Hún hágrét í hvert skipti sem ég minntist á hundinn en annars ekki. Grét bara vegna hundsins,“ sagði Tómas.

Veltir fyrir sér hvort hún geri þetta viljandi

Í dag er síðasti dagur í aðalmeðferð málsins en líklegast mun dóm­ur falla í mál­inu fyr­ir sum­ar­lok­un dóms­ins í lok júlí. Dag­björt, sem er 43 ára, hef­ur setið í varðhaldi frá því að málið kom upp. Henni er gefið að sök að hafa beitt mann margþættu ofbeldi á heimili hennar í Bátavogi í aðdraganda andláts hans. 

Spurður hvort að hann hafi einhverju skýringu á hve mismunandi mat þeirra var á Dagbjörtu segir Haraldur að hægt sé að velta því fyrir sér hvort að hún geri þetta viljandi. Hann veltir einnig upp hvort að þessi einkenni hennar brjótist út þegar hún er undir álagi eða er vansvefta eða taki breytingum eftir því hvernig félagslegum tengslum hún á í.

Telur áfallastreituröskun ólíklega

Haraldur telur jafnframt ólíklegt að hún þjáist af áfallastreituröskun en segist mjög viss um að hún sé með athyglisbrest á hæsta stigi og að hún hafi sýnt væg einhverfu einkenni.

„Ég sá hana nokkru sinnum á þessu ári og það varð ekki mikil breyting. Hún róaðist nokkuð niður eftir að hún fór á ADHD-lyfin og var betur fyrir komin og hélt betur athygli í samtölunum,“ sagði Haraldur sem skrifaði upp á lyf vegna athyglisbrests fyrir hana árið 2021.

Haldi ekki þræði og erfitt að marka hvað hún segir

Tómas tók fram fyrir dóminum að hún hafi verið að nota Elvanse, sem er notað við athyglisbrest, í september á síðasta ári en Haraldur man ekki eftir því að hafa skrifað upp á það lyf fyrir hana en að hann hafi vissulega skrifað upp á annað lyf fyrir athyglisbrest.

„Þessi kona hefur mikla skerðingu. Það er erfitt að fá áreiðanlega upplýsingar frá henni. Hún heldur ekki þræði og erfitt að marka hvað hún segir. Það hefur vissuleg áhrfif á niðurstöðuna. Niðurstaða mín var að hún væri sennilega talsvert greindarskert. Svolítið erfitt að meta það þegar hún er með mikið ADHD. Hún er að skora hámark í ADHD mælingum,“ sagði Haraldur.

Átti við skapsveiflur að stríða

Haraldur nefndi einnig að Dagbjört hafi fæðst þrjá mánuði fyrir settan tíma og að hún hafi í gegnum tíðina sýnt einkenni drómasýki. Dagbjört hafi sagt honum að hún hafi oft á tíðum átt við miklar skapsveiflur að stríða og að það hafi oft verið stutt í pirringinn hjá henni. Tómas sagði að grunnskólaganga hennar hafði gengið vel.

Hann setti þann varnagla á að erfitt hafi verið að greina og meta ástand Dagbjartar á svona litlum tíma einn síns liðs. Best hafi verið að leggja hana inn á viðeigandi stofnun til lengri tíma þar sem viðunandi heildarmati hefði getað farið fram. Erfitt sé að meta hvort að um skammtímaástand hafi verið að ræða eða langvarandi veikindi.

Hann vísar því þó á bug að hún hafi þjást af ranghugmyndum og tekur fram að hún hafi ekki lýst sérkennilegum skoðunum eða hugmyndum í viðtölum hjá honum.

„Hún talaði frekar um staðreyndir en tilfinningar sínar. Hún átti erfitt með að ræða tilfinningar sínar.“