Opna bað­stað í Kerlingar­fjöllum um helgina

Í fréttatilkynningu frá Bláa lóninu, sem á og rekur ferðamannastaðinn Highland base í Kerlingarfjöllum segir að um sé að ræða einstakan baðstað við fjölbreytta gisti- og veitingaaðstöðu sem opnaði síðasta sumar á hálendi Íslands. Böðin séu opin öllum gestum Kerlingarfjalla og þannig tilvalinn áfangastaður eftir útivist á hálendinu.

Í upphafi síðasta sumars hafi endurbætt gisti- og veitingaaðstaða verið opnuð í Kerlingarfjöllum. Þar sé nú boðið upp á fjölbreytta gistimöguleika, nýtt tjaldsvæði og svefnpokapláss í gömlu skálunum, sem gjarnan eru kallaðir Nípur.

Leiðin að Kerlingarfjöllum liggi um hinn sögufræga Kjalveg, sem sé fullfær fólksbílum á sumrin og Kerlingarfjöll því tilvalinn áfangastaður fyrir þá sem vilja upplifa hálendi Íslands. Sætaferðir séu í boði alla daga yfir sumartímann.

Hæstánægður með fyrsta árið

Magnús Orri Marínarson Schram er forstöðumaður viðskiptaþróunar nýrra áfangastaða hjá Bláa Lóninu hf. en fyrirtækið stendur fyrir uppbyggingu og rekstri gistiaðstöðunnar og Hálendisbaðanna í Kerlingarfjöllum.

í tilkynningu segir að hann sé afar ánægður með vel heppnað fyrsta rekstrarár og fullur eftirvæntingar fyrir komandi tímum.

„Fyrsta árið okkar gekk vonum framar. Það hefur verið mikil eftirspurn eftir aðgengilegri gistingu á hálendi Íslands og einstaklega ánægjulegt að geta svarað þeirri þörf. Með opnun Hálendisbaðanna hafa gestir nú enn fleiri ástæður til þess að sækja svæðið heim og njóta þeirrar fegurðar sem umlykur allt“

Sveitarstjórinn sáttur

Þá er haft eftir Aldísi Hafsteinsdóttur, sveitarstjóra Hrunamannahrepps, að hún sé afar ánægð með uppbyggingu innviða á svæðinu, enda sé aukið og einfaldara aðgengi afar mikilvægt samfélaginu öllu.

„Alla tíð hafa Kerlingarfjöll verið segull bæði heimamanna og erlendra og innlendra gesta. Með uppbyggingunni sem nú hefur átt sér stað í Kerlingarfjöllum er enn fleirum en áður gert kleift að dvelja í fjöllunum. Afar ánægjulegt hefur verið að sjá hversu vel framkvæmdirnar falla að því stórbrotna umhverfi sem þarna er. Hér í Hrunamannahreppi brenna heimamenn fyrir afréttinum og ekki síst fjöllunum fögru. Framkvæmdir eins og þær sem nú eru orðnar að veruleika í Kerlingarfjöllum styrkja bæði ferðaþjónustu og uppbyggingu samfélagsins sem hér hefur byggst upp á hálendisbrúninni.“