Helen Óttars í herferð Juicy Couture

Dóra Júlía Agnarsdóttir skrifar 4. september 2024 07:03

Fyrirsætan Helen Óttars er í ýmsum spennandi verkefnum erlendis. Aðsend

Fyrirsætan Helen Óttarsdóttir er búsett í London og hefur unnið að ýmsum spennandi verkefnum í tískuheiminum. Hún sat nýverið fyrir skvísumerkið Juicy Couture og stefnir jafnvel á bandarískan markað á næstunni. Blaðamaður tók púlsinn á henni.

Helen segir að prufuferlið fyrir herferðir sé gjarnan frekar hefðbundið en hún er með umboðsmann sem sér um að bóka prufur fyrir hana.

„Umboðsmaðurinn minn (e. agent) stillti upp þessari prufu fyrir Juicy Couture. Ásamt því að mæta með hreint hár og náttúrulega förðun var reyndar sérstaklega óskað eftir sterkum persónuleika, meira að segja skrifað í hástöfum fylgdum með fjórum upphrópunarmerkjum, sem er svona heldur óeðlilegt en vissulega í takt við brandið.“

Juicy Couture sérhæfir sig í svolítið goðsagnakenndum kósý göllum og varð sérstaklega vinsælt í kringum aldamótin. Stórstjörnur á borð við Paris Hilton og Britney Spears sáust oftar en ekki skarta slíkum göllum úr velúr efni í alls kyns litum.

Helen á setti í bleikum Juicy Couture buxum.Aðsend

Aðspurð hvort hún sé almennt aðdáandi Juicy Couture segir Helen:

„Sko svona já og nei, þetta er að sjálfsögðu „iconic“ merki og ég man eftir því að hafa verið mjög lítil og þráð ekkert heitar en að fá gallann með juicy á rassinum, sem ég virðist svo hafa fengið í gegn. En ég veit samt ekki hvort þetta sé endilega lúkk sem ég er að vinna með í dag.“

Þriggja ára gömul Helen í Juicy galla á LAX flugvellinum í Los Angeles.Aðsend

Helen er búsett í Hackney í Austur London.

„Það er lang skemmtilegasta hverfið í london að mínu mati. Daglegt líf er svo alls konar. Ég reyni að fara í ræktina flesta morgna og svo annað hvort er ég að fara í prufur (e. castings) á daginn eða verkefni í London eða annars staðar í Evrópu svo það er svo sem ekki mikil rútína.

Svo er ég líka að vinna hjá framleiðslufyrirtæki hérna í London svo ef ég er í „módelfríi“ þá er ég á skrifstofunni.“

Helen fer í ýmsar prufur og ferðast sömuleiðis mikið.Aðsend

Fyrirsætustarfið felur í sér ýmsar prufur og ferðast Helen mikið sökum starfs síns.

„Flest verkefni eru bókuð eftir að maður hittir kúnnann í castingi, það er frekar óalgengt að þú sért bókaður án þess allavega svona fyrst um sinn. Svo er ótrúlega næs þegar maður er farinn að vinna með sama fólkinu aftur og aftur í svona stórborg, þá er kominn aðeins meiri heimafílingur.“

Helen elskar að vinna aftur með sama fólkinu, þá myndist svolítill heimafílingur.Aðsend

Það er ýmislegt spennandi á döfinni hjá Helen.

„Það er alltaf nóg að gera. Ég er á leiðinni til Svíþjóðar núna í nokkra daga, svo til Manchester og svo aftur til London. Svo vill móður-agentinn minn að ég fari svo að skoða Ameríkumarkaðinn bráðlega, New York eða Los Angeles,“ segir Helen að lokum.